UMkhokheli webandla leMDC, uMnu. Nelson Chamisa usexolisile kubalandeli bakhe kulandela amazwe akhe awethule izolo awokuthi abatshengisela mhlaka 1 Ncwabakazi bekhonona ngokuphuza kokwethulwa kwempumela yokhetho lugatsha lwe ZEC, bayiziwula. Kodwa baxolile na abasekeli bakhe kade sebethukuthele ngalamazwi?
UChamisa ubesethulela intathelizindaba imbono yakhe esigodlweni sebandla le MDC eHarare ngokubizwa kwakhe ukuyafakaza kukhomisheni ecwayisisa ngodlakela olwenzakala eHarare kwafa abantu abayisithupha lapho athuke khona abatshengiselayo.
Exolisa uChamisa uthe ubengajonganga ukuthethisa abasekeli bakhe kumbe loba ngubani owatshengisela mhla ka 1 Ncwabakazi njengoba lokhu kulilungelo lomuntu wonke elizweni ofuna ukutshengisela.
Kodwa ingcwethi kwezombusazwe, uMnu. Richard Mahomva ekhuluma leStudio 7 uthe amazwi kaChamisa aveze ukungabi losizi kulabo abalahlekelwa zimpilo zabo ezandleni zebutho.
“Inkulumo zika Chamisa zitshengisa ukuthi kayisuye mkhokheli olesineke labantu abalahlekelwa zimpilo zabo njalo simbona engela nyembeza ukuthi abantu abanye bakhalela izihlobo zabo kodwa yena uthi abantu labo bayizibula ikakhulu labo ababonakala begijima ukuthi kuphume impumela zokhetho. Lokhu kuyasitshengisa ukuthi abezombusazwe bathanda ukusebenzisa abantu ukuthi babe lenzuzo njalo bengayenelisa ukuthola inzuzo eyenza bethole amandla bayalahla abantu njalo lokhu sekusitshengisa ukuthi uChamisa ngeke wathenjwa ukuthi abengumuntu ongathungamela uzulu lapho ayabe efuna ukukhankasela ukulwisa uhulumende ngoba uzulu engenza njalo kube lamapholisa kumbe abantu belimale uyadela abantu ukuze agcwalisise izifiso zakhe,” kutsho uMahomva.
Abanye abakhulume leStudio 7 bathe loba uChamisa esexolisile kusafanele achasise ukuthi imbiko ayetshela abasekeli bakhe ngesikhathi ekhankasela amavoti eyokuthi nxa iZEC ingethulanga impumela etshengisa ukuthi iMDC inqobile kukhetho lukamongameli kufanele bangene ezitaladeni bevikele amavoti abo.
Kodwa omunye okhulume leStudio 7 uMnu. Mthulisi Ncube oyisakhamuzi seHarare uthe uMnu. Chamisa engabe ekhulume lawa mazwi engumuntu obezama ukuzihlambulula kusehlakalo sika 1 Ncwabakazi ngoba esebhekane lenkinga yokuthi engabotshwa.
Oskomitshi wamapholisa, Umnu. Godwin Matanga efakaza phambili kwekhomishini ecwayisisa ngodlakela lolu wathi uChamisa nguye owatshotshozela abantu ukuthi batshengisele, okukhomba ukuthi engazithola sezimkhalele insimbi.
“uChamisa kumele limzwisise ukuthi amazwi awakhulumileyo izolo uwatsho ngenhliziyo engahlalisekanga ngumuntu olesikhathi ehlukuluzwa ngamapholisa kahulumende njalo isyananzelela ukuthi kathesi sebesithi nguye owabangela lolu dlakela kungabe kuyindlela akade ezama ukuthi azihlambulule ngayo kodwa kumele sinanzelele ukuthi izolo ntambama ubuye wabhala ku akhawunti yakhe eye Twitter esithi ubecela uxolo ngalokhu okwenzakaleyo njalo ubengajonganga ukuzwisa ubuhlungu kumbe ukuthethisa abantu abatshengisela mhla ka 1 Ncwabakazi, kungabe kuyindlela yokuthi ukhulume efuthelwa,” kutsho uNcube.
Kodwa obanye bathe kuyadanisa ukuthi uzulu ukhanya esephatheke ngenkulumo kaChamisa ekhohlwa udaba oluyilo olumele lucwayisiswe olokubulawa kwabantu lokuthi kanti vele ngubani owapha imvumo yokudubula abantu.
UMnu. Ntokozo Mabhena okhulume le Studio 7 uthe sekusobala ukuthi ibandla le ZANU Pf selithethe lesi sehlakalo lasithuthukisa njengendlela yokukhohlisa uzulu ukuthi owathuma amasotsha ezobulala abantu ngubani.
“Siyizwile imqondoka Chamisa, siyizwile kumaphephandaba lakubomabonakude, kodwa abantu sebefuna ukuphambuka indlela bekhohlwa ukuthi kuyini okubalulekileyo. Okubalulekileyo yikuthi umthetho ubambe labo ababulala abantu. Ukuthi ngubani owathumeza amasotsho ukuthi abulale abantu njalo kuzenziwani ebantwini bonabo abalahlekelwayo,” kutsho uMabhena.
Kunjalo nje, iskhulumeli sekhomisheni yona le ecwayisisa ngodlakela luka 1 Ncwabakazi uMnu. John Masuku uthe ukubizwa kukaMnu. Chamisa ukuthi azofakaza akusikho kuthatha icele kodwa yisigaba sokuthi laye uChamisa azofakaza njalo ikhomisheni isazonxusa wonke umuntu ofaneleyo ukuthi azofakaza esigabeni esiphambili.
“Nxa ikhomishini ibiza abantu ukuthi bazonika ubufakazi obutshiyeneyo iyabe ibabiza bezimele bodwa kumbe bemele inhlanganiso, ayisikho ukuthi iyabe ibabiza ukuthi bazokwenza ingxoxo. Okuqakathekileyo yikuthi okwalesi isikhathi ikhomishini ikubonile ukuthi kufanele ukuthi ibize umnumzana Chamisa ngakho ke ikhangele okuqondane lomnumzana Chamisa nxa kuzakuba lalokho okuyabe kufuna njalo umongameli izakubona njalo ngenye indlela kodwa ukubizwa komunye akutsho ukubizwa komunye,” kutsho uMasuku.
UMnu. Chamisa yena wembe phansi etshela intathelizindaba izolo ukuthi vele akasoze ayefakaza phambili kwekhomishini le nxa umongameli Emmerson Mnangagwa labasekeli bakhe omnumzana Constantino Chiwenga lo Kembo Mohadi labo benganxuswanga.
Ezinye iziphathamandla zeMDC ezibizwe ukuyafakaza ngumsekeli kamgcinisihlalo, uMnu. Tendai Biti, lomsekeli kaMongameli, uMnu. Morgen Komichi abangakazisi ukuthi bazakuya na ukuyafakaza.
