Kulabantu abatshe balimala kakubi eHarare ngoMvulo kungozi yokuqhamuka komlilo lapho okusebenzela abaphila ngokwenza imisebenzi yezandla efana lokubaza, eGlenview 8 Complex.
Kunakanelwa ukuthi abantu laba balahlekelwe yimpahla engena kunkulungwane lenkulungwane zamadola. Impahla le igoqela amasofa lenye nje esetshenziswa ezindlini.
Indawo le ike yatsha njalo nyakenye kwaba lomonakalo omkhulu. Isikhulumeli samapholisa uNkosikazi Charity Charamba utshele iStudio 7 ukuthi basacwayisisa.
Lanxa singenelisanga ukuzwa ukuthi bakhona yini abafileyo, imifanekiso egcwele enkundleni zokuxhumana itshengisa abantu abatshe kakubi emzimbeni wonke.
Omunye ubethe daca phansi elele ngesiphundu kuthi abanye bebesezimoteni begijinyiselwa esibhedlela.
Ingozi le iza ngemva kokutsha kwesakhiwo esihlala odokotela abasebenza esibhedlela seMpilo koBulawayo ngoMgqibelo.
Ngeviki edluleyo kulebhasi elumathe njalo umlilo eGwanda duzane leWest Nicholson kwafa abantu abangamatshumi amane lambili.
Omeli isigaba seSoutherton edale lephalemende njalo elilunga leMDC uMnu Peter Moyo uthi okudanisayo ngomlilo weGlenview yikuthi umanisipala useke wazama ukuyilungisa kuhle lindawo kodwa wavinjwa ngabayilawulayo.
