Isimo sokungasebenzi kwamaphilisi emzimbeni esibizwa ngesilungu ngokuthi yiAntimicrobial Resistance sibikwa siludubo oselubhahe emhlabeni jikelele njalo abezempilakahle bathi sinzima ukwedlula umkhuhlane wengculaza.
Imbiko le iza ngesikhathi amazwe omhlaba ephakathi kokunanza umkhankaso weWorld Antibiotic Awareness oqale mhlaka12 kulinyaka njalo ophela mhlaka 18.
Ikhansili yakoBulawayo yona imanyane logatsha lwezempilakahle bekhulumisana ngamanyathelo angathathwa ukulwisana lesimo sokungasebenzi kwamaphilisi lokhu.
“Sesinanzelele ukuba akhona amaphilisi angasasebenziyo emzimbeni ngoba izinanakazana eziyabe zisemzimbeni ziyabe sezijamelana lemaphilisi zingasabulawa yimithi enathwa yizigulane,” kutsho umsekeli kamqondisi wezempilakahle kumasipala wakoBulawayo, uDokotela Khulamuzi Nyathi.
UDokotela Nyathi uqhubeke wathi udubo lokungasebenzi kwemithi bakubone ngesikhathi ilizwe libhekane lomkhuhlane wesihudo abantu bengasasili ngesikhathi esifaneleyo.
UDokotela Portia Manangazira, ongumqondisi kwezokuvikelwa kwemikhuhlane elizweni kugatsha lwezempilakahle lokondliwa kwabantwana, ongumcinisihlalo njalo wequla labodokotela ababona ngezeAntimicrobial Resistance ukhuthaze amavinkili athengisa imithi ukuba angathengiseli izigulane imithi enjengama antibiotics.
“Udubo lokungasebenzi kwamaphilisi lunzima ngakho ngikhuthaza amavinkili athengisa imithi elizweni ukuba bangathengiseli izigulane ama-antibiotics njalo lozulu laye angayibamba ngamandla amavinkili emithi labodokotela ukuba babathengisele ama-antibiotics ekunqabeleni iAMR," kutsho uMananganzira.
