Abantu abaphila lobugoga sebekhuthaze uhulumende ukuthi engabalibali lapho ehlela uluhlu lwendleko zakhe oluzakwethulwa ngumphathintambo wezemali uMnu Mthuli Ncube ngoLwesine.
“Njengabantu abakhubazekileyo sikhangelele ibudget ezaletha umahluko omkhulu empilweni zethu kwezemfundo, imitshina ehlukeneyo esincedisa ukuphila kunye lamabhuku ahambelana lesimo sokukhubazeka kwethu abathi yibrail ukuze lathi siphile sithuthuke,” kutsho uSenator Watson Khuphe omele izigoga edale lephalamende.
UKhuphe usole umthelo wokubili ekhulwini owaphawula ngumphathintambo wezenotho esithi usubaphilisa nzima.
“Udubo lwemali yenhlawulo ekuthengeni okubili ekhulwini, sekusiphilisa nzima thina abakhubazekileyo, nanko lapho sesithenga impahla ezisincedisa empilweni lathi esincediswa ngabanye abantu sesiyihlawuliswa itax okubangela ukuba siphile nzima,” kutsho uKhupe.
Omela isigaba seBulawayo Central edale lephalamende, uNkosikazi Dorcas Sibanda, uvumelane loKhuphe esithi ezemfundo, ezempilakahle lokuhlala kwabantu kumele kuthole imali ethe thuthu hatshi ukupha ibutho imali enengi ngoba ilizwe alikho empini.
“Sikhangelele ukuba umphathintambo uNcube ethule ibudget ezalungisa ezemfundo, ezempilakahle kanye lokuhlala kwabantu,” kutsho uMaSibanda.