amalinks wokungena

Breaking News

Abalwela Amalungelo Oluntu Baphiwa Izicoco Yinhlanganiso yeDumiso Dabengwa Foundation


Inhlanganiso yeDumiso Dabengwa Foundation sisungule izicoco ezibizwa ngamagama amaqhawe lamaqhawekazi aphatheka kumzabalazo wokukhulula ilizwe leZimbabwe.

Izicoco lezi ziphiwe amagama agoqela elikaSydney Malunga, Joshua Mqabuko Nkomo, Johanna Fuyane, Tenjiwe Lesabe, Jason Ziyaphapha Moyo, Alfred Nikita Mangena, George Silundika loGarfield Todd.

Inhlanganiso yeDumiso Dabengwa Foundation ithi izicoco lezi, ezilesihloko esithi Ihawu Awards, sezizahlala ziphiwa izizalwane zeZimbabwe eziqhuba imisebenzi ebukekayo ethuthukisa impilo zabantu, ikakhulu kwezamalungelo, mnyaka ngomnyaka.

Abazitholileyo koBulawayo ngoLwesihlanu bagoqela intathelizindaba elodumo uZenzele Ndebele, yena ophiwe inhlonipho yeSydney Malunga Award ngokusungula ilibrary emayelana ngombhuqazwe weGukurahundi.

Umkhokheli wenhlanganiso yeHabakkuk Trust uMnu Dumisani Nkomo laye uphiwe isicoco esifanayo.

Umkhokheli wenhlanganiso yeWoza uNkosikazi Jenny Williams lomkhokheli weWomen’s Institute for Leadership Development uNkosikazi Samukeliso Khumalo, baphiwe izicoco zeThenjiwe Lesabe Awards ngokulwela amalungelo abesifazana.

Abasakhulayo abafana lelunga ledale lephalamende uNkosazana Joanna Mamombe kanye lokhansila wakoBulawayo uMnu Mlandu Ncube bona baphiwe izicoco phansi kweJason Ziyaphapha Moyo Awards ngokuba ngontanga abakhutheleyo kwezombusazwe.

Isicoco seJoshua Mqabuko Nkomo siphiwe umndeni wakhe njalo samukelwe yindodana yakhe uMnu Sibangilizwe Nkomo. UMnu Nkomo uncome kakhulu umsebenzi owenziwe nguMnu Dumiso Dabengwa lenhlanganiso yakhe.

“Izicoco lezi siyazemukela ngenhliziyo ezimhlophe ngezandla ezivulekileyo kuyinto enhle eyenziwe yiDD Foundation lezi zicoco siyazamukela sizinikela kuZulu weZimbabwe olothando njalo othanda ukuthula,” kutsho uNkomo.

Omunye wabathole izicoco lezi ngowayeyisiphathamandla seviyo leZipra kanye loMkhonto weSizwe uMnu Moffat Hadebe.

“Siyabona ngomsebenzi walamuhla kanye lokuthola isicoco ngithabe kakhulu kodwa angithabanga ngoba asihlonitshwa nangu omunye engilaye lapha asinanzwa umuzi wakhe lawo ungawubona ngeke utsho ukuthi walelwa ilizwe,” kuchasise uHadebe.

Umkhosi lo ungenwe langumkhokheli weMDC uMnu Nelson Chamisa laye otshayele ihlombe iDD Foundation kanye labathole izicoco.

“Ngiyalibingelela lonke, ngiyabonga, ngiyajabula sithabe kakhulu ngomsebenzi weDD Foundation kaBaba uDabenwa kungumsebenzi omuhle,” kutsho uChamisa ekhuluma leStudio 7.

Abanye abaphatheke emkhosini lo nguNkosikazi kamuyi uLookout Masuku, uNkosikazi kaNikitha Mangena, amanxusa avela kweleSouth Africa labanye abanenginengi.

UMnu Dabengwa yena uthe inhlanganiso yakhe ngekazulu njalo uzimisele ukusebenza labo bonke abalesifiso sokhulisa umsebenzi wayo.

please wait

No media source currently available

0:00 0:03:54 0:00
XS
SM
MD
LG