Abantu abanengi eZimbabwe sebephila ngokubheja amabhiza lemidlalo yenguqu ngenxa yokusilela kwemisebenzi lokutshabalala komnotho.
Ababhejayo laba bathi le yiyo yodwa indlela abangaphilisa imuli zabo. Ukubheja lokhu kubikwa kusukela kudola kusiyaphezulu.
Omunye wababhejayo nguMcebisi Maligwa, otshona emkambo weSuperbet, uthi kwesinye isikhathi basebenzisa imali kamakhalekhukhwini eyeEcocash nxa bengelamali ezandleni zabo.
“I-SuperBet thina siphila ngayo baba akula esingakwenza ngoba akula misebenzi. Yiyo yodwa indlela esitshona sizilibazisa ngayo njalo yiyo yodwa indlela esingaphila ngayo,” kutsho uMaligwa.
Abanengi abakhulume leStudio 7 bathe inzuzo abayitholayo iyehlukana kusiya ngenhlanhla yomuntu ngalelolanga njalo kusiya ngokuthi uyabe ebheje ngemali enengi kanganani.
Kulomunye obheje ngedola obikwa enqobile wathola inkulungwane ezedlula ezinhlanu zamadola ($5,400) kunsukwana ezedlulayo.
Kodwa uNkosikhona Msimango, isakhamizi eHarare, uthi wake wakuzama ukubheja walahlekelwa yimali enengi kakhulu. Uthi kulabanye abalegazi lokubheja.
“Okokubheja lokhuyana kulabanikaza, kulabantu sibili abakutshela ukuthi bathole imali enengi kakhulu kodwa kulegazi lakhona; mina kwangehlula,” kutsho uMsimango. “Ngakuzama kodwa kulabanye asebephila ngakho. Kuyabasebenzela.”
Lanxa inengi lababhejayo kungamadoda, abesifazana labo bayatholakala.
UNkosikazi Adelaide Masuku, oseleminyaka emibili ebheja emikambo etshiyeneyo eHarare, uthi kwabanzima ukuthi obaba bamamukele emkambo wokubheja ngoba kwakungajwayelekanga ukubona omama labo bebheja.
Uthi uselolwazi lokubheja olwedlula amanye amadoda.
“Sengathenga impahla yendlini enengi ngokubheja khonokhu, i-economy inzima, akula misebenzi elizwe. So, ngingenzani kulokuthi ngizidingela umsebenzi njengakhonokho ukubheja vele asila enye indlela,” kutsho uMasuku.
Kodwa udaba lokubheja alukhuthazwa ngabokholo lwesiKhristu abagoqela uMfundisi Philani Ndlovu.
“Nxa sesisiya eBhayibhelini, impumela zokubheja yizo ezenza ukubheja kube yisono. Ukubheja kuletha imikhuba ethile engalunganga,” kutsho uNdlovu.
“Impumela le esiyitshoyo luthando lwemali ngoba imali yokubheja ayikusuthisi, uyabheja namuhla ucine usungohlala ubheja. Imuli ezinengi sezatshabalelwa yimpahla lemali lento ezinengi ngenxa yomkhuba lo.
“IBhayibheli ku 1st Timothy 6 vs 10 ithi ukuthanda imali kuyimpande yezinhloso zonke zobubi abanye abantu ngokutshisekela imali baphambuka ekukholweni bezigabela izinsizi ezinengi.”
Edolobheni lakoBulawayo lakho libikwa likhula inani labantu asebephila ngokubheja.
UMandlenkosi Sibanda, ohlala elokitshini leEmakhandeni, uvukela edolobheni ekuseni nsukuzonke njengaye wonke umuntu osebenzayo.
Kodwa umfoka Sibanda kaqhatshwanga muntu njalo akasuye omunye walabo abaphila ngokuthengisa emigwaqweni. Esakhe isikhathi usichitha esendaweni zokubheja esezimemetheke zagcwala koBulawayo.
USibanda, olilunga lenhlanganiso yeZimbabwe Freestyle Football Federation, uthi uqale ukungena endaweni zokubheja esiyazibukelela umdlalo wenguqu ukuze athole ulwazi ngokwenzakala emazweni aphetsheya kodwa laye wacina esehawukela.
“Mina ngingumuntu osebenza ezomdlalo wenguqu yikho kuyanginceda ukuba ngibekwazi ngolwazi lokwenzakalayo kwezemidlalo ngoba akulamuntu ololwazi ngokwenzakala kwezomdlalo wenguqu njengomuntu obhejayo,” kutsho uSibanda.
“Okwesibili ngingatsho ukuba lami ngiyabe ngifaka imali ngikhangelele ukuba ngingathola okuthile kodwa kukalutshwane yikho nje ngikhangelele ukuba ngithole ulwazi engilundingayo olwezemidlalo yenguqu.”
ULiberty Mutsinzi, othi yena ukubheja akusiyo indlela afuna ukuphila ngayo njengoba kwesinye isikhathi kungamhambeli kuhle, uthi uyabheja ngoba ingekho enye indlela angathola ngayo imali.
UMutsinzi laye uvumelane loSibanda esithi abanikazi bezindawo zokubheja yibo abathola imali enengi ngoba kunzima ukuthola imali ethe xaxa ngokubheja.
“Abanye bayawina kodwa akusibo bonke abawinayo. Laba (abe sports bet) benza imali enengi ngoba imali ewinwayo ababuyi layo endlini kodwa ibuya labantu,” kutsho uMutsinzi.
“Abantu abawinayo balutshwana njalo kulamalanga okuthi babekhona abawinayo njalo kuyabe kufana nje ukuba bathole ingxenye ezifanayo labanikazi balezizindawo.”
Kulendawo ezedlula ezinhlanu ezitholakala koBulawayo lapho okubhejwa khona njalo lezondawo zitshona zigcwele abantu bezama inhlanhla.
Kulezindawo kutholakala omabonakude abayabe betshengisa imidlalo etshiyeneyo egoqela eyenguqu, eyokuncintisana kwezinja kanye leyokuncintisana kwamabhiza kube khona njalo lemidlalo eyokuzibazela ebizwa ngesilungu kuthiwa yi-virtual sport.
Abaziyo bathi amaqembu angaziwayo yiwo abhadala ngcono ungabhejela wona ngoba lawo ayaziwayo eyandelwa ngabantu okudala ukuba inzuzo ibephansi.