Abanye babalimi bomumbu bakhala ngabenkampani kahulumende ethenga lokuthengisa umumbu eye Grain Marketing Board – GMB elokhu ingakabahlawuli imali yomumbu abawuthengisela kiyo sezize ziyisithupha inyanga selokhu benza lokho.
Abalimi abakhulumisane lalumsakazo bathi isimanga yikuba inhlolisiso abayenza ebhanga labalimi le Agribank yaveza ukuba imali yahlawulwa kodwa yathathwa ngabantu abangaziwayo kulokuthi iye kubalimi.
Omunye walaba balimi osehlangane laloludubo ngunkosikazi Juliet Moyo wase sisiqintini sase Zhamba e Gokwe.
Unkosikazi Moyo uthi ule tonne yomumbu ayisa e GMB Depot yako Manoti mhla ka 10 Ntulikazi njalo kumele ahlawulwe imali eyedlula kancane amakhulu amane amadola ( $404-00 ) kodwa kuze kube lamuhla lokhu engakayibhadalwa leyo mali.
Wavuliswa iaccount ebhanga le Agribank njengalokho okumele kwenziwe wanikezwa iaccount number kodwa kaphiwanga icard kwathiwa ayelinda okwensuku ezilitshumi andubana athole imali yakhe.
UNkosikazi Moyo uthi isimanga kuyikubana ekubuyeleni kwakhe ngemva kokubana sezanele lezonsuku ezazibethiwe katholanga lutho wabuyela njalo e GMB lapho atshelwa khona ukuba imali yakhe yabhadalwa kodwa yangeniswa ku account engayisiyo.
Wakhuthazwa ukuba avule njalo enye iaccount wakwenza lokho waphiwa le card lakhona kodwa akazange aphiwe ipin number yalo.
“Ma sengifona manje sebentshintshana I phone ibanjwe ngulo ibanjwe ngulo akula nto ecacayo engiyi tshelwayo.
Akuzwakali ukuthi kuthiwani. Umlomo wabo owokucina nje ngowokuthi the money was paid just wait for the money.
So sengize ngasuka ngeza ngapha e headquarters e Harare.
Ma ngifika lapho bafika bakhangele ku computer bangitshele ukuthi I account number leyo okuthiwa I correct was just entered ku computer but akuzange kuntshintshwe lutho, nothing was done,” kutsho uMoyo.
Unkosikazi Moyo uthi iqiniso lize layavela lapho eseye ebhanga labalimi le Agribank emveni kokuba abesigodlo se GMB e Harare bethe kaye khona kucatshangelwa ukuba leyo mali ilokhe ikulelobhanga.
“Ngithi ma ngifika laphana e Agribank bavele bangamukele bangitshengise ukuthi I card lami leli elesibili leli engaliphiwayo siqale sizame ukuswiper ngalo laphana sithole ukuthi vele akula information eliyikhuphayo I card leliyana liyala ngitsho uku enter I pin. Okungangokuthi vele kalisebenzi. Leyana I account abangipha yona besithi I wrong I active. Yiyo eyangena imali and imali yakhona sebayithatha ayisekho. Kule 27cents kuphela,” uMoyo.
Omunye walaba balimi uMnu. Booker Dliwayo olima ese Chipinge ugcizelele kulokho okutshiwo ngu Nkosikazi Moyo.
“Udaba lwama accounts yilo oseluhluphile. Ngoba bathi vula khonapho nxa ungathi wena ubuvele ulenye kudala bathi vula kuphela. Asazi ukuthi kungani baguqula indlela abalimi bebethola ngayo imali ngoba yayithunyelwa kuma phone abo.
Nyakenye sathola imali zethu ngendlela yokuthunyelwa ema fonini abomakhalekhukhwini. Layo lindlela ibilobuqili okukade busenziwa. Le eyokuthi abalimi bavule ama account bekuyimizamo yokukulungisisa lokho kodwa sesihlangana lobunzima njalo,” kutsho UDliwayo.
UNkosikazi Moyo uthi isimanga yikuthi imali yomumbu awuthengisela iDepot yinye yako Manoti okwesibili seyabuya.
Uthi yikhona ezaphindela njalo esigodlweni se GMB e Eastle ukuyabonana labohlangothi lwe Loss Control beziphala ze GMB.
