Umqeqetshi weqembu leFC Platinum uNorman Mapeza uthi iqembu lakhe selifake unyawo olulodwa kusigaba esilandelayo somncintiswano weCAF Champions League ngemva kokuba ngutshiki lobhanqa, 1 ka 1 leqembu leAS Otoho elakweleCongo Brazzaville khonale kweleCongo.
Ekhuluma lentatheli ekupheleni komdlalo lo ngeSonto uMapeza ukhale kakhulu ngendlela onompembe abaphathe umdlalo.
“Le yimpumela enhle kakhulu kithi njalo okumele sikwenze yikuba sisebenze kanzima sibaqedise bengabuya kwelakithi,” kutsho uMapeza.
“Siyathokoza ngalimpumela kodwa wonke umuntu uzibonele nje ukuba bekulokuqilibezela okuthile. Kungaqhubeka kusenzakala lokhu kuzakuba nzima ukuba umdlalo wenguqu uthuthuke eAfrica nxa onompembe besebenza ngalindlela.”
Lumdlalo ubuphethwe ngonompembe abadabuka kweleTogo.
Ngaphambilini kwalumdlalo iqembu leFC Platinum lithi kalizange liphathwe kuhle khonale kweleCongo emizameni yokulihlukuluza ukuze lingaphumeleli.
Umdlalo wehlandla lesibili ukhangelelwe ukubakhona ngempelaviki ezayo lapho iFC Platinum ezakwamukela khona iAS Otoho enkundleni yeMandava.
Iqembu elizaphumelela ngempelaviki yilo elizadlulela kusigaba esilandelayo lapho okuyabe sekusele khona amaqembu alitshumi lanhlanu wona azafakwa ezibayeni ezine, njalo iqembu letshumi lesithupha ngeleEsperance elaseTunisia okuyilo eliphethe linkezo.
Ukuhlelwa kwamaqembu ngezibaya kukhangelelwe ukuqhutshwa mhla zingamatshumi amabili lathobaminwembili kuyonale inyanga.
Amaqembu azaphutsha imidlalo yezibaya esendaweni ezimbili eziphezu kwengalane yiwo azadlulela kuma-quarter finals.
Nyakenye iqembu leFC Platinum okuyilo njalo ebelimele eleZimbabwe alenelisanga ukufinyelela kusigaba sezibaya okuyikho lapho okulenzuzo ethe xaxa etholwa ngamaqembu ayabe ephatheke kulumncintiswano.
Kolunye udaba olumayelana ngomdlalo wenguqu, uMongameli omutsha wenhlanganiso yeZifa, uFelton Kamambo sethembise ukuba inkokheli yalinhlanganiso entsha izasebenza gadalala ukuthuthukisa umdlalo wenguqu.
UKamambo utshele intathelizindaba zemidlalo ngemva kokunqoba uPhilip Chiyangwa ngeSonto ukuba uzimisele ukufeza zonke izithembiso azenze ngesikhathi ekhankasa.
“Isikhathi sokhetho sesidlulile sekuyisikhathi sokufeza izithembiso esazenza kubalandeli bomdlalo wenguqu. Sekumele sikhweze amasokisi ngoba umsebenzi esibhekane lawo mkhulu,” kutsho uKamambo.
“Angithandabuzi kodwa ukuba ubukhokheli lobu obutsha buzaqhuba kuhle umsebenzi ngoba abanye bakhona sengike ngasebenza labo ngiyabazi njalo ngiyabathemba.”
Abanye ababumba inkokheli yeZifa entsha bagoqela uGift Banda ongumsekeli kaMongameli kanye lamalunga eboard uPhillemon Machana, uSugar Chagonda, Brighton Malandule kanye loRodrick Chamu Chiwanza.
