UMongameli Emmerson Mnangagwa uthi sebuyelile emsebenzini okwesiphangiphangi ikhefu lakhe lingakapheli ukuze akhulumisane labodokotela asebedlulise inyanga bephakathi kokukhalala umsebenzi.
Odokotela laba bafuna uhulumende ebengezelele iholo aphinde ebahlawule ngedola leMelika.
Bathi njalo uhulumende kumele alungisise umumo ezibhedlela ngoba kungelamithi yokwelapha izigulane.
Uhulumende labodokotela laba sebeke bahlala phansi bakhulumisana kodwa behluleka ukuvumelana.
Omunye wabasekeli bakaMnangagwa, onguye njalo obephethe isikhundla sikaMongameli, uMnu Constantino Chiwenga uke wazama ukwethusela odokotela laba ngeviki edluleyo kodwa wehluleka.
Umgcinisihlalo webandla leMDC-T eMelika uMnu Den Moyo utshele iStudio 7 ukuthi lanxa engelathemba lokuthi uMnangagwa uzakwenelisa ukuluqeda loludaba, wenze kuhle ngokuphenduka emsebenzini.
