Uzulu uthi uthukuthele kakhulu phezu kokwehluleka kukahulumende ukulungisisa udaba lokukhalala umsebenzi kwabodokotela esebedlulise inyanga bengayi ezibhedlela.
Odokotela laba bakhonona ngokusilela kwemithi yokwelapha izigulane njalo bathi bafuna ukuholiswa ngedola leMelika.
Okucunule abantu abanengi yikuthi uhulumende sethembise ukudingela inkampani epheka utshwala, iDelta Corporation imali yakweleMelika kodwa esala ukubhadala odokotela ngayo.
Inkampani le ibimemezele ukuthi kuqaa namuhla utshwala bayo kanye lenamnede kuzathengiswa ngemali yeMelika ngoba kuyiyo edingakalayo nxa ithenga ekusebenzisayo ekuphekeni izinto lezi.
Abongi lababalisi izolo bavumelane ukukhalala umsebenzini labo besithi bafuna ukubhadalwa ngemali yeMelika.
Ingcwethi kwezombusazwe uMnu Effie Dlela Ncube uthi kusobala ukuthi izisebenzi zikahulumende zizakhalala umsebenzi ngobenengi phezu kodaba lunye.
Uthi njalo uhulumende kumele aphange alungisise udaba lwabodokotela lolu ngoba umumo ungamandla kuhle ezibhedlela.
Kodwa ingcwethi ecubungula ezenotho uMnu Richard Mahomva uthi uhulumende ngeke enelise ukuhlawula izisebenzi zakhe ngemali eziyifunayo ngoba engelayo.