Ukaputeni weqembu lomdlalo wenguqu ele FC Platinum uPetros Mhari ukhuthaza abalandeli bomdlalo wenguqu edolobheni lako Bulawayo ukuba basekele leliqembu kusasa lapho elizadibana khona leqembu le Orlando Pirates elase South Africa enkundleni yeBarbourfields.
Iqembu le FC Platinum lizemukela ele Orlando Pirates ngoMgqibelo enkundleni ye Barbourfields emdlalweni wakuqala owemidlalo yezibaya kumncintiswano walonyaka owe CAF Champions league.
Ngokwakuqala ukuba abafana be FC Platinum bafinyelele ukuyadlala kusigaba sezibaya salumncintiswano selokhu baqala ukuphatheka kumidlalo eyokudinga intshantshu zezwekazi lase Africa.
Lokhu bakwenelise ngemva kokunqoba iqembu le CNaPS elase Madagascar kanye lele AS Otoho elase Congo Brazzaville kuzigaba zakuqala ezomncintiswano.
Lumdlalo uqhutshelwa enkundleni ye Barbourfields ngoba inkundla ye Mandava okuyiyo ikhaya leqembu le FC Platinum kwathiwa ayikulungelanga ukudlalelwa imidlalo yalelizinga.
Lokhu sekudale impikiswano phezu kokuthi abalandeli bomdlalo wenguqu abahlala edolobheni lako Bulawayo basekele liphi iqembu kusasa njengoba bebanengi abavele bezithandela iqembu le Orlando Pirates.
Ukaputeni weqembu le FC Platinum enguye njalo unozinti weqembu leli uPetros Mhari ukhuthaze abalandeli bomdlalo wenguqu ukuba basekele iqembu le FC Platinum ngoba phela lona limele ilizwe lonke lase Zimbabwe kulumncintiswano.
“Ngokubona kwami singenelisa ukunqoba kusasa. Kumele abalandeli babuye bezosikela loba bengabe besekela iqembu le Highlanders, ele Dynamos kumbe ele CAPS United kufuze basisekele ukuze sibe lamadlabuzane.
Bakhethe ukuthi sizodlalela ko Bulawayo ngoba kuseduze lase Zvishavane yikho ke abalandeli kumele bazosikela, bezosekela iqembu lekhaya,” kutsho uMahari.
Iqembu le FC Platinum yilo elimela ilizwe le Zimbabwe kulumncintiswano wokudinga intshantshu zezwekazi lase Africa ngemva kokuphakamisa isicoco seligi njalo likusibaya sika Group B ndawonye leqembu le Esperance elase Tunisia okuyilo eliphethe isicoco, iOrlando Pirates yase South Africa kanye le Horoya AC eyase Guinea.
Amaqembu azaphutsha imidlalo ehlezi endaweni ezimbili eziphezu kwengalane yemiklomelo kuzibaya ezine yiwo azadlulela kusigaba esilandelayo esomncintiswano esama quarter – finals.
Onompembe abazaphatha umdlalo wakusasa bavela elizweni lase Rwanda njalo onguye oyabe evuthela impembe ngu Jean Claude Ishimwe.
