amalinks wokungena

Breaking News

Uhulumende weSouth Africa Kuzizalwane Zakhe: Phathisani Abawelwe Yingozi Yezulu Lesiphepho eZimbabwe


Uhulumende wakweleSouth Africa usekhuthaze izizalwane labosomabhizimusi bakulelo lizwe ukuthi baqoqe uncedo lokuyaphathisa abantu abawelwe yingozi yezulu lesiphepho eZimbabwe, eMozambique laseMalawi.

Ugatsha olubona ngobudlelwano beSouth Africa lamanye amazwe lwazise ngoMvulo ukuthi solilaye izigodlo zalo emazweni womathathu la ukuthi zicubungule isimo ukuze kwazakale ukuthi yiluphi uncedo olufunekayo ngesiphangiphangi.

Isikhulumeli salolugatsha uMnu Ndivhuwo Mabaya uthe baqoqoda eminyano yamankampani, eyenhlanganiso ezizimeleyo lakuzulu makhaza.

“Sesingena kuhlandla losizo lwesibili lapho abantu asebebhidlikelwe yimizi, abaselazigqoko, abasela kudla; yikho sinxusa izizalwane zeSouth Africa labosomabhizimusi bethu abakulawa mazwe, amankampani amakhulu kuleli lenhlanganiso ezizimeleyo ukuthi bonke bazosiza ukuze lesi simo singadlulisi amalawulo,” kutsho uMabaya.

EleSouth Africa lithumele njalo amazwi enduduzo kuhulumende weZimbabwe, oweMozambique loweMalawi ngokutshona kwalabo ababulawe yilesi siphepho.

Kusenjalo ezinye izizalwane zaseZimbabwe ezihlala kweleSouth Africa lazo seziqalisile ukukhuthaza abeZimbabwe abasemazweni ukuthi labo baqoqe uncedo baluse ehofisini yomeli weZimbabwe ukuze luthunyezwe ekhaya.

Isikhulumeli seZanu PF kweleSouth Africa uMnu Kennedy Mandaza utshele iStudio 7 ukuthi abangeke bagoqe izandla ozwelabo bedinga usizo.

“Sithi lesi yisikhathi sokuthi size ndawonye lakho konke esilakho, besicela abangane bethu esidlelana labo basize ngokudla, amatende, ingubo lokunye okunengi,” kutsho uMandaza.

please wait

No media source currently available

0:00 0:03:18 0:00
XS
SM
MD
LG