UMongameli Emmerson Mnangagwa namuhla uhlele ilanga langoMgqibelo lelangeSonto ukuthi abe ngamalanga okukhalela abantu abahlaselwe lizulu lesiphepho.
Inani labafele kulingozi libikwa selisedlula ikhulu elilamatshumi amathathu njalo likhangelelwe ukuqansa ngoku kusalamakhulu abantu abangaziwayo ukuthi bangaphi.
UMnangagwa uthi uzulu kumele ebambane kumalanga womambili ekhumbula ababhubhele kulingozi kanye labakhukhulelwe imizi yabo basala bengela lutho.
Abasinde kulingozi basesimeni esibi njalo bakhala ngokuthi kabatholi uncedo abaludingayo, olugoqela ukudla lezigqoko, ngemfanelo.
Izulu lesiphepho leli, uCyclone Idai, lihlasele eManicaland lakwezinye indawo zeMasvingo. Liqothule njalo eMalawi laseMozambique lapho elidale khona umonakalo omkhulu.