Umumo uqhubeka umubi kakhulu eManicaland lapho abantu abasinde kungozi yezulu lesiphepho abakhala khona ngokuthi kabalutholi ngemfanelo uncedo abaludingayo, ikakhulu ukudla.
Abantu laba baphephele endaweni ezitshiyeneyo ezifana lamathempeli, amahotela kanti bakhona abanye ababikwa belokhe besegangeni.
EChimanimani Hotel kulabantu abangamakhulu amane, 400, abaphephele khona ngemva kokudilikelwa yimizi. Inengi labo lifelwe yizihlobo labangane.
Iphathamandla senhlanganiso yeMethodist Development and Relief Agency uMnu Clever Owen Tabaziba utshele iStudio 7 ukuthi lunengi uncedo oludingakalayo.
Ekhuluma eseChimanimani Hotel lapho ahambise khona ukudla ngoLwesihlanu, uTabaziba ukhuthaze uzulu weZimbabwe ukuthi eqhubeke ephathisa abantu beManicaland.
Abantu abanengi babikwa bengakafinyelelwa ngamaqula athwele ukudla ngoba indawo abakuzo zingahambeki. Imigwaqo eminengi yavaleka kwathi amabholoho lawo akhukhulwa lizulu.
