Ibandla leMDC elikhokhelwa nguMnu Nelson Chamisa ligqibe umhlangano walo weCongress obuqhutshelwa eGweru ngoMvulo laphuma lenkokheli entsha egoqela abasekeli bakaChamisa abathathu ababalisa uMnu Welshman Ncube, uMnu Tendai Biti loNkosikazi Lynette Karenyi-Kore.
Abanqotshiweyo ezikhundleni lezi bagoqela uMnu Morgen Komichi, uMnu Elias Mudzuri, uNkosikazi Lilian Timveos loNkosikazi Tracy Mutinhiri.
Onqobe kukhetho lokudinga umgcinisihlalo webandla nguNkosazana Thabitha Khumalo, yena obencintisana loMnu Joel Gabuza loMnu Bekithemba Mpofu.
Umsekeli kaMaKhumalo nguMnu Job Sikhala. Unobhala jikelele nguMnu Charlton Hwende yena onqobe obekulesisikhundla uMnu Douglas Mwonzora loMnu Daniel Molokele.
UMnu David Coltart nguye osengumphathisikhwama weMDC kuthi uNkosikazi Paurina Mupariwa nguye osengumgcinisihlalo wogatsha lwabesifazana. Usekelwa nguNkosikazi Phyllis Ndlovu.
Ibandla leli liphume lezinqumo ezitshiyeneyo ezigoqela esokuthi kumele kuqhutshwe inkulumo zokudinga isisombululo kunkinga ezithwalise uzulu weZimbabwe nzima lokuthi kumele uhulumende aguqule indlela aqhuba ngayo ukhetho.
UMnu Ncube utshele iStudio 7 ukuthi bazasebenza gadalala njengebandla ukuze uzulu weZimbabwe aphile ngcono.
Kusenjalo, amapholisa eHarare abophe amalunga enhlanganiso ezilwela amalungelo oluntu amabili abalisa uNkosikazi Rita Nyampinga loSitabile Dewa egcekeni lendizamtshina eleRobert Gabriel Mugabe International Airport ngesikhathi bevela phandle kwelizwe.
Ababili laba bangabanye babantu abahlanu ababotshwe ngeviki edluleyo labo bevele phandle kwelizwe betheswa icala lokuqoqa ukuvukela umbuso weZanu PF.
Amagqwetha eZimbabwe Lawyers for Human Rights amela uNyampinga loDewa athi ababili laba lokhe bevalelwe njalo ayalisiwe ukubabona. Akukaziwa ukuthi betheswa cala bani.