Abenhlanganiso ezilwela amalungelo oluntu ababili ababotshwe ngoMvulo eRobert Gabriel Mugabe International Airport bevela phandle kwelizwe, abathi uNkosikazi Stabile Dewa loNkosikazi Rita Nyampinga, sebetheswe icala lokuqoqa ukugenqula uhulumende kaMongameli Emmerson Mnangagwa.
Ababili laba babotshwe besanda kwehla endizamtshineni eHarare bevela emhlanganweni wenhlanganiso ezilwela amalungelo oluntu kweleMaldives. Bazamiswa emthethwandaba ngoLwesithathu.
UNkosikazi Dewa ngowenhlanganiso yeHeal Zimbabwe Trust njalo uNyampinga yena ngoweFemale Prisoners Support Trust.
Lanxa uDewa evalelwe esitokisini, uNkosikazi Nyampinga yena ulaliswe esibhedlela seParirenyatwa ngoba engezwa kuhle. Amagqwetha akhe athi ulindwe ngamapholisa.
Ngeviki edluleyo kubotshwe abanye njalo abenhlanganiso ezizimeleyo abahlanu ngesikhathi bengena elizweni bevela emhlanganweni ofanayo. Labo betheswa icala lokuzama ukuvukela umbuso weZanu PF.
Abantu laba bebemele bamiswe enkantolo ngoLwesibili kodwa akusenzakalanga lokhu. Ngokunjalo, sebezamiswa ngoLwesine lapho abazacela khona ukuthi bakhululwe ngemali yesibambiso, ibail.
Olwela amalungelo oluntu uMnu Effie Dlela Ncube uthi ngokuqhubeka ebopha abantu abaphikisana lombuso wakhe, uhulumende kaMnangagwa usekuveze sobala ukuthi uyafana xathu lokaMnu Robert Mugabe.
Kodwa ilunga leZanu PF uMnu Believe Gaule ukulandule lokhu esithi ngempala bakhona abenhlanganiso ezizimeleyo abazama ukuvukela umbuso kaMnangagwa.