Isigodlo someli weMelika eZimbabwe kanye labenhlanganiso ezilwela amalungelo oluntu sebesole uhulumende weZanu PF ngokuhlukuluza abenhlanganiso ezikhankasela ukulondolozwa kwamalungelo abagoqela abahlanu ababotshwe ngeviki edluleyo bevela phandle kwelizwe lababili ababotshwe ngoMvulo.
Ababili laba, uNkosikazi Stabile Dewa loNkosikazi Rita Nyampinga, bamiswe emthethwandaba ngoLwesithathu besetheswa icala lokuqoqa ukuvukela umbuso kaMongameli Emmerson Mnangagwa njalo baqhubeka bevalelwe.
Abahlanu ababotshwe ngeviki edluleyo labo betheswa icala elifanayo.
Umeli weHarare West edale lephalamende uNkosazana Joana Mamombe, olilunga leMDC laye ubotshiwe wamiswa emthethwandaba ngoLwesithathu esetheswa icala lokwephuma imithetho ephathelane lokhetho olwedluleyo.
Ukhululwe ngemva kokuhlawuliswa ikhulu lemali yesibambiso.
Ukubotshwa kwabantu laba kuchothozwe ngabenhlanganiso ezizimeleyo ezisebenza ziphansi komanyano weZimbabwe Human Rights NGO Forum emhlanganweni wabo abawenzele eHarare.
Umanyano lo uthi uhulumende kumele atshiyane lokuhlukuluza abantu abalwela amalungelo njalo ahloniphe isisekelo sombuso.
Amazwi la agcizelelwe yinhlanganiso elwela ukulondolozwa kwamalungelo emhlabeni jikelele eyeAmnesty International.
Isigodlo seMelika laso sethule umbiko enkundleni yeTwitter sikhuthaza uhulumende ukuthi atshiyane lokubopha amalunga enhlanganiso ezizimeleyo njalo ahloniphe isisekelo sombuso leminye imithetho yelizwe epha abantu beZimbabwe inkululeko.
Isiphathamandla seZimbabwe Human Rights NGO Forum uNkosazana Thobekile Mutimba utshele umsakazo weStudio 7 ukuthi bakhathazekile kakhulu ngokwenzakalayo.
Asenelisanga ukukhulunisana leziphathamandla zikahulumende ngaloludaba.