Uhulumende kaMongameli Emmerson Mnangagwa seqhatshe inkampani yaseMelika eyesibili ukuthi imncedise ukukhankasela ukwesulwa kwezijeziso zenotho ezetheswa amalunga eZanu PF nguhulumende weMelika.
Imbiko esiyamukele izolo iveza ukuthi umphathintambo obona ngobudlelwano bezimbabwe lamanye amazwe uMnu Sibusiso Moyo ulobelane isivumelwano leAvenue Strategies Global ngoMabasa bavumelana ukuthi eleZimbabwe lizabhadala linkampani imali engena kusigidi esisodwa, i$1 million ngomnyaka ukuze igqugquzele ukwesulwa kwezijeziso zenotho.
Inkampani le iphiwe njalo umlandu wokukhuthaza wonke amazwe angetshonalanga ukuthi amukele eleZimbabwe esibayeni sezizwe zomhlaba njalo aliphathise kunhlelo zokuvuselela umnotho walo.
Ngombimbitho uhulumende weZanu PF uqhatshe njalo inkampani yemelika eyeBallard Group ukuthi imenzele umsebenzi ofanayo imhlawula ingxenye yesigidi ngomnyaka.
UMnu. Nkululeko Sibanda, oyisikhulumeli somkhokheli weMDC, uMnu Nelson Chamisa, uthi ngaphandle kokuguqula izenzo zakhe, ukuqhatsha amankampani akweleMelika ukuthi amveze njengohulumende omuhle akusoze kumphathise uhulumende kaMnangagwa.
Kunjalo nje, unobhala kamphathintambo wezembiko, uMnu. Nick Mangwana uthe kazilutho ngenkampani le eqatshiweyo kodwa wathi kaboni lutho olubi nxa iqatshwe okusemthethweni.
UMangwanga uthi njengoba ilizwe libhekane lezijeziso zenotho kumele idinge amankampani afana layonale ukwenqabela imbiko eya nganxele esipha umzekelesi wamanye amazwe afana le Saudi Arabia athi ilamankampani anje amahlanu kunye le Rwanda eyayilamahlanu kodwa isilamathathu.
