amalinks wokungena

Breaking News

Abanye Bathi Akulalutho uMnangagwa Azaluthola kuUS-Africa Business Summit, Kodwa Abanye bathi Akwaziwa Okwanonisa Ingulube


UMongameli Emmerson Mnangagwa uye kweleMozambique ngoLwesibili ukuyaphatheka emhlanganweni ojonge ukukhuthaza ubudlelwano obuhle kwezamabhizimusi phakathi kweMelika lamazwe eAfrica, oweUS-Africa Business Summit.

Umbuthano lo uza ngesikhathi umnotho weZimbabwe uqhubeka ubhidlika ngamandla, intengo zikhuphuka mahlayana njalo lemali yeZimbabwe igugudeka nxa iqathaniswa ledola leMelika.

UMongameli Mnangagwa ungomunye wabaholi abakhangelelwe ukukhuluma emhlanganeni lo. Ukhuthaza njalo abatshali bezimali abavela emazweni atshiyeneyo ukuthi bazevule amabhizimusi abo eZimbabwe.

Kodwa umbuzo omkhulu ngothi uzaphumelela na kulokhu nanku phela useke wakhuluma emihlanganweni efanayo kodwa abekho abatshali bezimali asebezile eZimbabwe.

please wait

No media source currently available

0:00 0:04:35 0:00

Cha, kasoze!, kutsho ingcwethi ehlaziya ezenotho uMnu Masimba Kuchera. Amazwi kaKuchera agcizelelwe ngenye njalo ingcwethi kwezenotho uMnu Kelvin Manduna.

Lanxa ababili laba besithi akulalutho olubambekayo uMnangagwa azaphenduka lalo eMozambique, ilunga leZanu PF uMnu Joseph Tshuma uthi kulungile ukuthi uMnangagwa abe semihlanganweni enje ekhulumisane labatshali bezimali.

Ukutshabalala komnotho sokubangele ukuthi ezinye izisebenzi zikahulumende zikhalale umsebenzi zisithi kumele zengezelelwe iholo lokuthi zibhadalwe ngedola leMelika.

Isikhulumeli senhlanganiso emela abathengi eyeNational Consumer Rights Association uMnu Effie Dlela Ncube uthi baphatheke kabi ngobunzima uzulu abhekane labo.

Umhlangano weUS-Africa Business Summit lo ukhokhelwa yinhlanganiso yamabhizimusi eMelika eyeCorporate Council on Africa.

Abakhokheli bakwamanye amazwe abazaphatheka kuwo bagoqela uMongameli weRwanda uPaul Kagame, oweKenya uUhuru Kenyatta labanye.

Lanxa abanye besithi akulalutho uMnangagwa azaphenduka lalo, abanye bathi akwaziwa okwanonisa ingulube.

Facebook Forum

XS
SM
MD
LG