Namuhla kuhlelo lwethu Liphuma Lendaba Litshona Lendaba sixoxa lengcwethi ecubungula ngezombusazwe, uMnu. George Mkhwananzi sihlaziya udaba lokuxoxisana okwenziwe nguMongameli Emmerson Mnangagwa lezinduna zesigaba seMatabeleland.
Kubikwa kukhulunywe indaba ezimbalwa ezibalisa ukuqatshwa kwabantu besigaba seMatabaleland abahlala bekhala ngokuthathelwa imisebenzi ngabavela kwezinye izigaba.
Okunye njalo okukhulunyiweyo ludaba lombhuqazwe we Gukurahundi.
UMkhwananzi uthi: "Okwakuqala engingakutsho yikuthi lokhu kutshengisa ukwethuka lokungezethembi kukahulumende kaMnangagwa ikakhulu ngendaba ephatha uMthwakazi, imvelaphi yakhe lomlandu wakhe ikakhulu kusukela ekubuseni kwayo iZanu."
Uthi lokhu ukutsho ngoba enyangeni ezintathu ezedluleyo uMnangagwa usenze imihlangano emibili kunyanga ezintathu ezisanda kwedlula okutshengisela ukuthi umzamo wokuqala awenza leMatabeleland Collective awuphumelelanga.
UMkhwananzi uthi ekuqaleni uMnangagwa waqala ngobunke esithi lokhu ngamanzi asedlule phansi kwebholoho.
"Itsiyane lethendele ngeke likhale ligcwale iguma kungekho okwenzakeleyo ezixukwini. Lisuka lenze njalo ngoba selethukile.Kutsho ukuthi kukhona okumhlokozayo yena uMnangagwa okwaziwa nguye lalaba abomtshetsha phansi wakhe abamtshela ukuthi sukuma masinya ucitshe umlilo," kutsho uMkhwananzi.
Uthi kunengi okwenziwa ngabantu besigaba abanye benza njengokutshisa kobulongwe obuvutha umlilo walo ungakhanyi.
