amalinks wokungena

Breaking News

Amapholisa Anqolonga uSikhala Phezu Kwamazwi Akhe Okuthi iMDC Izagenqula uMnangagwa Embusweni


Amapholisa eHarare anqolonge umsekeli kamgcinisihlalo weMDC uMnu Job Sikhala ngoMvulo phezu kwamazwi awethule eBikita ngempelaviki lapho abikwa ethe ibandla lakhe lizagenqula umbuso kaMongameli Emmerson Mnanaggwa ukhetho luka2023 lungakafiki.

USikhala ukufakazile ukuthi ngempela ubiziwe ngamapholisa ogatsha lweLaw and Order njalo uthe uzakuyawabona kusasa ekuseni.

Embikweni awethule ngoMvulo uhulumende uchothoze amazwi kaSikhala esithi uzakwelula isandla somthetho ngendlela elukhuni alubana ibandla leMDC lithe lalinga ukumgenqula.

Lanxa amapholisa esebize uSikhala phezu kwaloludaba, isikhulumeli sikahulumende uMnu Nick Mangwana ubethe kabasoze bathathe amanyathelo okwamanje.

UMangwana uthe ibandla leMDC likhanya lijonge ukuphazamisa uhambo lwequla likahulumende eliseBhilithani, lona elikhokhelwa ngumphathintambo obona ngobudlelwano beZimbabwe lamanye amazwe uMnu Sibusiso Moyo.

Ibandla leMDC lalo lethule umbiko lisithi uMnu Sikhala ubekhuluma ezimele njalo imbono yakhe ngeyakhe yedwa.

Isikhulumeli salelibandla uMnu Fortune Daniel Molokele utshele iStudio 7 ukuthi iMDC kayilayo injongo yokugenqula umbuso kaMnangagwa.

please wait

No media source currently available

0:00 0:02:09 0:00
XS
SM
MD
LG