Abanye osomabhizimusi babikwa beqhubeka ngokuthengisa ngemali yakwamanye amazwe okungasavunyelwa lanxa uhulumende wafunga ijoyi esithi abazaqhubeka bethengisa ngedola leMelika kumbe imali engasidola leZimbabwe bazajeziswa kalukhuni.
Uhulumende wethule umthetho kumaviki amabili edluleyo ovimba ukusetshengiswa kwemali yangaphandle kwelizwe.
Ukudingisisa esikwenzileyo kuveze ukuthi akhona amabhizimusi asathengisa ngemali yakwamanye amazwe, ikakhulu iRand laseSouth Africa.
Lokhu kubikwa kubhahe esigabeni se Matabeleland. KoBulawayo khona isiphathamandla seZanu PF njalo engomunye wabakhokheli bama war vet, uMnu Victor Matemadanda uthi ezinye izitolo ezinkulu lonke zithengisa ngedola leMelika.
UNtungamili Nkomo weStudio 7 uxoxe lomthengi uMnu Paul Ndlovu, othi ukumiswa kwemali yakwamanye amazwe sokubangele ukuhlupheka okukhulu kuzulu.
UNdlovu uthi: “Sayitsho lento ukuthi yebo na bazayifaka leyo Zim dollar yabo but izo affecta intengo yezinto ngani ngoba ungathi ungabheka uzathola ukuthi ilizwe lethu alika produce into ezinengi bazithatha out of the country.”
Uthi imali osekumele isetshenziswe eye Zimbabwe kuzabangela ukuthi osomabhizimusi bakhuphule intengo yempahla.
Uthi okumele kwenziwe yikuthi lanxa abantu belamacebo ababheki elakusasa ukuthi akusoze kubaphazamise kusasa na.
“Bona basuka bathathe isinqumo basifake kodwa ababheki ukuthi kuzahamba njani. Lanxa beleplan bayabe becabangela ukuthi singenza lokhu kuzahamba njani. Iplan vele bona abaselayo,” kutsho uNdlovu.
