Izakhamizi zeBinga zithi sezithwele nzima ngendwangu ezixhwalileyo ezitshona zigqekeza ezindlini lasesibhedlela esikhulu seBinga District Hospital zintshontsha ukudla.
Indwangu lezi zihlasela ikakhulu abesifazana abazithweleyo labantwana besikolo zibahluthunela yiloba yini abakuphetheyo.
Izakhamizi zithi zihlukumezekile kakhulu njalo zithi sesiside isikhathi zidinga usizo kugatsha lwezendle olweZimbabwe Parks and Wildlife Management Authority kodwa zingalutholi.
“Sesithwele nzima ngendwangu lezi. Zazivele zikhona kodwa zazingahluphi njengakhathesi. Angazi kumbe yindlala eyenza zihlasele kanje,” kutsho umgcinisihlalo weBinga District Residents Association uMnu Elias Sibanda.
“Ngendlela ezithathela ngayo abantu ukudla lokunye, sesisesaba ukuthi ngelinye ilanga zilakho ukuhluthunela umuntu wesifazana umntwana.”
Asenelisanga ukukhuluma labeZimbabwe Parks and Wildlife Management Authority ngaloludaba ngesikhathi sisiya emoyeni.
Kusenjalo, abazingeli balolugatsha balokhu bephakathi kokuthungatha izilwane esezihluphile ePlumtree, ezigabeni ezigoqela esakoBhutje lesakoNdolwane.
Izilwane lezi sezilamaviki amathathu zifikile kulezindawo njalo zibikwa sezibulele inkomo lamadonki okwedlula amatshumi amabili.
Sezilethe njalo ukwesaba okukhulu ezigabeni lezi, ngokutsho kwesakhamuzi uMnu Christian Dube.