Sekuqhamuke ukungezwani phakathi kwabatshayeli bezimota ezithwala uzulu, abakweleBotswana labeZimbabwe edolobheni leFrancistown bebanga ibhizimusi.
AbeBotswana bathi kulabeZimbabwe abatshayela izimota zokuthwala abantu ezingabhaliswanga ngokusemthethweni ababathathela izihambi kanye lempahla emangweni ophakathi kweFrancistown lomngcele wePlumtree.
Umgcinisihlalo wenhlanganiso yeBotswana Bus Trucks and Taxis Association, uMnu Brian Moyo, uthi sebeke bazama ukukhulumisana labeZimbabwe ukuthi bayekele abakwenzayo ngoba kulakho ukudala ukuqhamuka kodlakela, noma nje bona bengafuni ukuthi abantu balwe, njengalokhu okwenzakala kweleSouth Africa.
Okumele kwenzeke yikuthi abeBotswana bathwale impahla lezihambi ukusuka eFrancistown kusiya emngceleni wePlumtree, basebededela kwabakoBulawayo abaqedisa uhambo, kodwa omalayitsha beZimbabwe bona bathwala umango wonke besuka eFrancistown besiyafika koBulawayo.
Omunye wabomalayitsha beZimbabwe abathwala abantu ngaphandle komthetho, uMnu Gabriel Sibindi, uthi kelezinsuku akulula emangweni weFrancistown lePlumtree, ngoba abalemitshova esemthethweni besidla amalahle.
“Sizama ukuziphilisa, bekuphileka kodwa khathesi sekunzima ngoba laba abalama-registered taxis sebetshinga besithi sibathathela ibhizimusi. Amapholisa akupha itikiti leP3, 000 uma engakubamba utshovisa ngokungekho emthethweni,” kutsho uMnu Sibindi.
OwakweleBotswana olemota ebhaliswe ngokusemthethweni, uMnu Kagiso Kenosi, uthi ibhizimusi yabo isiphansi ngenxa yabeZimbabwe laba.
“Sacina sibona kufanele ukuthi sibike loludaba emapholiseni kanye lokuthi sixoxisane lenhlanganiso yethu eyama taxis association, ukuze sizame ukuqeda udubo lolu,” kutsho uKenosi.
