amalinks wokungena

Breaking News

'Ikhomishini Yenkohlakalo eZimbabwe Kumele Ibe Lesibindi njengeyaseSouth Africa'


Izizalwane zeZimbabwe ezihlala kweleSouth Africa sezikhuthaze ikhomishini elwisa inkohlakalo eyeZimbabwe Anti-Corruption Commission (ZACC), ukuthi isebenze ngokungesabi lokungakhethi njengekhomishini ecubungula izenzo zenkohlakalo eSouth Africa eyeJudicial Commission of Inquiry into Allegations of State Capture, Corruption and Fraud.

Selokhu ikhomishini yakweleSouth Africa le iqale ukusebenza mhlaka 21 Ncwabakazi 2018, isibize abantu phose abalikhulu, umuntu wonke ebukele emsakazweni kamabonakude.

Asebefakazile laba bagoqela owake waba nguMongameli uMnu Jacob Zuma, ababengabaphathintambo, ababengabaqondisi bamankampani kahulumende, abaqondisi bamankampani azimeleyo, labanye abalolutho abalwaziyo ngokuhuquluzwa kwempahla lemali yesizwe.

Le yinto abeZimbabwe abasemazweni abathi bafuna ukubona isenziwa yiZimbabwe Anti-Corruption Commission.

Okwakuqala bathi kusegcekeni ukuthi inengi zenkokheli zelizwe, okugoqela owayenguMongameli uMnu Robert Mugabe, labanye abalokhu bekuhulumende khathesi, balenotho esezandleni zabo abayibtshontsha kunotho yelizwe.

Unobhala jikele webandla leZimbabwe Communist Party uMnu Ngqabutho Mabhena, uthi ngesikhathi kususwa uMugabe esihlalweni kwathiwa kulabantu abalenkohlakalo eduze kwakhe, ngakho yibo labo abamele bajongwe yiZACC.

“Ngoba siyabona amaparastatals lawo asehamba ngamadolo, sokwaphela. I-Air Zimbabwe sesilendiza eyodwa. IZESA siyehluleka ukuthi abantu bathole i-electricity. OZisco Steel sekwavalwa konke lokho kusenziwa yi-corruption,” kutsho uMabhena.

Osebenza ehofisini yezokwethulwa kwemibiko kubandla leZapu uMnu Nkosikhona Ndlovu, uthi asikho isizatho esenza likhomishini ibe ilokhu ingakaqali umsebenzi wayo ngoba ubufakazi bokuthi kulamasela abulele umnotho bugcwele ndawana yonke.

“Umama uMildred Shiri ubelokhe ekhipha amaAuditor General reports atshengisela ubugwelegwele obenzakala emakhansilini, atshengisela ubugwelegwele obenzakala kuma-parastatals. So, mina ngibona engani ubufakazi bonalobo benele ukuthi abantu bengabotshwa njalo ubugwelegwele bumiswe,” kutsho uNdlovu ekhuluma leStudio 7.

Umeli weMDC ekhokhelwa nguMnu Nelson Chamisa kweleSouth Africa uMnu Austin Moyo, yena uthe ikhomishini yeSouth Africa yisibonelo esihle kakhulu ngoba wonke othintekayo uyabuzisiswa kugoqela abaphathintambo abasezikhundleni.

“Siyabonake manje ukuthi phela nanzi impethu ziyavela obala. Esingakwazi-ke yikuthi lezimpethu, zizowubona na umnyango wasenkantolo noma zizozindizela zihambe? Okusalayo iyadingeka le ikomishana ukuthi ibekhona eZimbabwe eyenkohlakalo. Amakomishini azodingida zonke lezi izinto zenkohlakalo ezenzeka lokukhwabanisa selokhu sathola uzibuse,” kuchasise uMnu Moyo.

Abanye bathi uhlupho oluzahlangana lekhomishini yeZimbabwe yikuthi bakhona abangathintwayo ngoba besondelelene lababusayo.

Bathi kuqakathekile ukuthi likhomishini izimele, umsebenzi wayo ungalawulwa yihofisi kaMongameli ukuze laye ma ebiziwe kube lula ukuthi abuzisiswe njengalokho okwenzeka eSouth Africa.

please wait

No media source currently available

0:00 0:04:13 0:00

Facebook Forum

XS
SM
MD
LG