EleMelika selethese izijesiso owayengumqondisi wohlangothi lwebutho olwabulala abantu abayisithupha ababetshengisela eHarare nyakenye ngemva kokhetho, uMnu Anselem Nhamo Sanyatwe, phezu kwesehlakalo lesi lokwephulwa kwamalungelo oluntu.
Embikweni awethule ngoLwesine, uhulumende weMelika wazise njalo ukuthi wethese umkaSanyatwe, uChido Machaona izijeziso ezifanayo.
USanyatwe usanda khethwa nguMongameli Emmerson Mnangagwa ukuba ngumeli weZimbabwe kweleTanzania.
EleMelika lithi liphatheke kabi kakhulu ngokuthi kuze kube namuhla, akulasotsha kumbe ipholisa elibotshiweyo phezu kokudutshulwa lokubulawa kwabayisithupha laba kanye lalabo ababulala abantu abalitshumi lantathu ngoZibandlela lonyaka.
Ngokunjalo, eleMelika likhuthaze uhulumende weZimbabwe ukuthi ajezise abantu laba njalo ahloniphe amalungelo oluntu.
Umanyano weEuropean Union lawo wethule inkuthazo efanayo.
Olwela amalungelo oluntu uMnu Charles Nyoni utshele iStudio 7 ukuthi uyakusekela kakhulu ukujeziswa kukaMnu Sanyatwe lomkakhe.
Kodwa isiphathamandla sikahulumende uMnu Nick Mangwana uthi bayazisola izijeziso lezi njalo uthi kazikho emthethweni.
Wengeze wathi uhulumende uphakathi kokulandela izixwayiso ezethulwa yikomishini eyaphenya udaba lokubulawa kwabantu laba eyayikhokhelwa ngowake waba nguMongameli weMelika uMnu Kgalema Motlanthe.