amalinks wokungena

Breaking News

Amapholisa eSouth Africa Alwisana Labakwanye Amazwe Abaphosele Amabhomba Epetulo Lamatshe


Amapholisa abopha ogqekeze isitolo. (Umfanekiso Ogciniweyo)

Kube lokulwisana okukhulu eJohannesburg izolo phakathi kwamapholisa labakwamanye amazwe ngesikhathi amapholisa engena ezitolo lemisikeni yabo ebathathela impahla lezigqoko abazithengisayo okucatshangelwa ukuthi zenziwe ngokungekho emthethweni.

Umgwaqo UJeppe osenzikini yedolobo leJohannesburg uphenduke inkundla yempi phakathi kwamapholisa labakwamanye amazwe abathengisa impahla ezehlukeneyo.

Amapholisa afike kulesi sitalada esilezitolo lemisika yabakwamanye amazwe abanengi abathengisa impahla, efuna ukuzokuduza lokuthatha lezo ezenziwe ngokungekho emthethweni zangeniswa elizweni nsitha.

Kodwake abakwamanye amazwe laba abebesedlula ikhulu baqoqene badobha amatshe, izimbodlela lakho konke abebengakusebenzisa baqala ukulwisana lamapholisa lawa. Lokhu kubangele ukuthi abapholisa abaleke.

Isikhulumeli samapholisa uMnu. Kay Makhubele utshele abezindaba ukuthi amapholisa acine esedubula ngenhlamvu ezilimazayo lokuphosa intuthu ehitshayo.

“Kulabantu abathathu abalimeleyo bathwalelwa esibhedlela. Imota zethu zilimele kakhulu ngoba bebephosela amabhomba ephethulo kulezi imota,” kutsho uMakhubele.

Loba kunjalo uMakhubele uthi ngeke bavumele abantubokuza bezenzela santando elizweni.

“Labo abenqabela amapholisa ukwenza umsebenzi wawo bazaba kwazi ukuthi kuleli lizwe kulomthetho njalo sizaqinisekisa ukuthi bayabotshwa,” kutsho uMkahubele.

Kodwake abakwamanye amazwe laba bathi bebevikela ilungelo labo lokuziphilisa. Isizalwane seZimbabwe uMnu. Greatman Mkhwebu uthi isenzo samapholisa lesi siyasolisa.

“Iqiniso lisobala. Bebehluba indlubu ekhasini. Bekuthagethwe ama foreigner lapha ngoba lomkhankaso ubuhleliwe, ngoba same time same sikhathi amapholisa simangele engena etaxi rand yaseRandburg ebopha amaforeigner. Ma ungelapassport nje ubuhamba. Babotshiwe abantu bakithi njalo kuzwisa ubuhlungu lokho ngoba lathi sinje amaphasipoti aphelile ngakho ususesaba ngitsho ukuyathenga umbida phandle ngoba uzahlangana lecross fire zikudobe njalo okulandela lapho sooner or later ixenophobia ingaqala loba nini,” kutsho uMkhwebu.

Amapholisa athi azabuyela ayezithatha impahla lezo kodwa abakwamanye amazwe laba labo bathi bazimisele ukuthi kunathiswane imbenge yamalahle.

Facebook Forum

XS
SM
MD
LG