Ikhomishini ebona ngokulwisana lenkohlakalo eyeZimbabwe Anti-Corruption Commission ithi owake waba ngumsekeli kaMongameli welizwe uMnu Phelekezela Mphoko ubalekile ngoMvulo ngesikhathi izama ukumbopha phezu kwecala lenkohlakalo aletheswayo.
Isikhulumeli salikhomishini uMnu John Makamure uthi sebazise imingcele yonke labogatsha lwe-Immigration ukuthi bambophe engazama ukuphuma elizweni.
Ikhomishini le yethesa uMphoko icala lokuyakhulula abasolwa eNkambeni yeAvondale Police Station eHarare ngomnyaka ka2016. Kodwa uMphoko uyalilandula leli cala.
Igqwetha lakhe uMnu Zibusiso Ncube uthi uhambe loMphoko emahofisini ekhomishini le ekuseni ngoMvulo bavumelana lamapholisa ukuthi baye emthethwandaba kodwa amapholisa la asuka aguqula ingqondo esesithi kumele baye eCentral Police Station.
Kodwa uNcube uthi bakwalile lokhu ngoba uMphoko esesaba ukuhlatshwa ijekiseni ezambulala engabotshwa.
UNcube uthi uMnu Mphoko uncwetchwe indlebe ukuthi ngempela kulejekiseni eletshefu azayihlatshwa afe engavele ebesezandleni zomthetho.
Ngokunjalo, utshele umsakazo weStudio 7 ukuthi uselobele umgcinisihlalo walikhomishini uNkosikazi Loice Matanda Moyo emazisa ngokuthi uMphoko uzimisele ukumiswa edale kodwa kafuni kuba sezandleni zamapholisa ngoba elakho ukumbulala.