amalinks wokungena

Breaking News

Uhulumende Uthi Ukhathazwe Yikuthunjwa Kuka Gonyeti Kodwa Ngokuthunjwa Kwabanye "Dololo"


USamatha Kureya owaziwa ngelokuthi Gonyeti.
USamatha Kureya owaziwa ngelokuthi Gonyeti.

Uhulumende uthi ukhathazekile ngokuthunjwa komlingisi, uGonyeti, kodwa kakhulumi ngokuthunjwa kwabanye elizweni jikelele.

UGonyethi, igama lokuzalwa kungu Samantha Kureya, ubikwa ethunjwe emzini wakhe ngoLwesithathu ebusuku ngabantu kade bezivale ubuso, bahamba laye bemtshaya kabuhlungu bemuthi agiqike phezu kodaka olwamanzi esambuzi kade egeleza eceleni komgwaqo.

Abantu laba abane, oyedwa ubikwa ubephethe isibhamu, babambe uGonyeti ngamandla ukuthi ananthe amanzi ezambuzi kade egeleza phansi andubana bamkhulule izigqoko bamtshiya ebhunyumunyu wagijima wayacela uncedo kuzakamizi ezimuphe impahla zokugqoka kungakabizwa amapholisa.

Amapholisa kunye logatsha lwezokwethulwa kwemibiko bazise ukuthi loludaba luyacuthsungulwa.

Isimanga yikuthi banengi abanye asebethunjiwe koBulawayo lase Harare kodwa amapholisa kunye lohulumende abakhulumi ngakho.

NgoLwesine umsekeli kamphathintambo wezemibiko, uMnu. Energy Mutodi, eloba enkundendleni ye Twitter, uthe uGonyeti uqamba amanga ukuthi wathunjwa, okucunule abalwela ilungelo loluntu abanengi.

Kuyonale iviki koBulawayo ngoMvulo bakhona ababikwa bezame ukuthumba umka khansila we Nketha olilunga leMDC, uMnu. Arnold Batsirayi, ophunyukileyo kodwa esetshayiwe.

Kuthi ngelanga linye unobhala jikelele wogatsha lwabatsha kulelibandla uMnu. Pashor Raphael Sibanda uthi wayedingwa ngabacatshangelwa ukuthi ngamapholisa ensitha awe CIO abathi sebemswele, bathumba uyise bamtshaya kakubi bamtshiya emangcwabeni eLuveve duzane leCowdray Park emadabukabusa.

XS
SM
MD
LG