amalinks wokungena

Breaking News

Umqoqi weMDC uMnu Chibaya Umiswe Enkantolo Njalo Uzaqeda Impelaviki Evalelwe Esitokisini


Umqoqi wenhlelo zeMDC uMnu Amos Chibaya umiswe emthethwandaba ngoLwesihlanu esetheswa icala lokwephula umthetho wePOSA ngokwehluleka ukumisa ukutshengisela kwebandla lakhe eHarare ngeviki edluleyo.

Igqwetha lakhe uMnu Obey Shava ucele umantshi ukuthi amkhulule ngemali yesibambiso (bail) kodwa abatshutshisi bakuphikisa lokhu.

Ngakho, uChibaya uzaqeda impelaviki evalelwe abesephindele enkantolo ngoMvulo lapho umantshi azaqhubeka ngokuhluza isicelo sakhe se-bail.

UMnu Chibaya ulelinye njalo icala elilokhe lisemthethwandaba elokuqoqa umvukela.

Ibandla leMDC lithi okumangalisayo yikuthi ukutshengisela okubotshelwe uMnu Chibaya lokhu akuzange kwenzakale ngemva kokwalelwa kwalo ngamapholisa.

Manengi amalunga eMDC asezitokitsini sikhuluma nje kumbe aseke abotshwa kunsukwana ezedluleyo esetheswa amacala atshiyeneyo.

Umgcinisihlalo walelibandla uNkosazana Thabitha Khumalo lamanye amalunga eMDC ayisithupha, bake babotshwa ngeviki edluleyo betheswa icala lokuqamba amanga ngokuthi kwaba lokulelezela kukhetho olwedluleyo.

Bakhululwe ngumthethwandaba kamantshi koBulawayo ngemali yesibambiso.

XS
SM
MD
LG