Amanye amabandla aphikisayo athi ngabe kulombuso omuhle elizweni, ngabe asikho isidingo sokuthi izizalwane zeZimbabwe ziye kweleSouth Africa lapho okuhlaselwa khona abokuza.
Ukuhlaselwa kwabakwamanye amazwe lokhu kuqale kumaviki amathathu edluleyo njalo inhlanganiso yeAfrica Diaspora Forum ithi asebefele kudlakela lolu bedlula amatshumi amabili lanxa nje uMongameli Cyrial Ramaphosa esithi balitshumi.
“Mina ngisola umbuso weZanu PF. Ngabe umumo uungile elizweni izizalwane zeZimbabwe ngabe zihlezi ekhaya lapha zisebenza kuhle zisidla zisutha,” kutsho ilunga leMDC uMnu Edwin Ndlovu.
Kodwa abeZanu PF bayakulandula lokhu besithi akuqondanga ukuthi kusolwe bona phezu kodlame oluqondiswe kwabamanye amazwe yizizalwane zakweleSouth Africa.
Ukuhlaziya loludaba sixhume ilunga leMDC uMnu Edwin Ndlovu lelunga leZanu PF uMnu Malaki Nkomo onguye osungula lingxoxo.
