Uhulumende ngoMvulo uthumele iqula elikhokhelwa ngumsekeli kaMongameli uMnu Kembo Mohadi kweleSingapore ukuyathatha isidumbu sikaMnu Robert Mugabe, yena obhubhele esibhedlela kulelolizwe ngoLwesihlanu.
Umphathintambo obona ngokwethulwa kwemibiko uNkosikazi Monica Mutsvangwa uthi iqula leli lizaphenduka lesidumbu ngoLwesithathu besesibekwa ngeSonto.
Kodwa katshongo ukuthi ngaphi. “NgoLwesine langoLwesihlanu isidumbu sizahanjiswa eRufaro Stadium lapho uzulu azavunyelwa khona ukumvalelisa,” kutsho uNkosikazi Mutsvangwa.
“Ngomgqibelo mhlaka 14 isidumbu sizahanjiswa eNational Sports Stadium lapho uzulu labameli bakwamanye amazwe abazamvalelisa khona. Uzangcwatshwa ngeSonto mhlaka 15.”
Kusenjalo, unobhala obona ngobudlelwano beMelika lamanye amazwe uMnu Mike Pompeo uthi uMugabe wayengumbusi omubi owayeyisikhohlakali njalo owabulala inkulungwane zabantu ngombuqazwe weGukurahundi.
Uthi uMugabe wabulala ilizwe ngokutshontsha enothisa imuli yakhe labangane bakhe batshiya uzulu ebhekane lobuyanga obumangalisayo.
Ngakho, uthi eleZimbabwe lidinga umkhokheli olonembeza ozahlonipha umbuso okhululekileyo njalo athuthukise impilo kazulu.
Lanxa kunjalo, umgcinisihlalo weZanu PF eMatabeleland South uMnu Rabelani Choeni utshele iStudio 7 ukuthi uMugabe ubengumkhokheli ohloniphekayo kakhulu njalo obesebenzela uzulu weZimbabwe.
