Ekuphileni kwakhe, uMnu Robert Mugabe wayesehlukanisa abantu ngemibono: bakhona ababemthanda kakhulu beyitshaya indiva imisebenzi yakhe emibi kuthi abanye ngababemzonda okumangalisayo.
Lokhe kunjalo lasekufeni kwakhe.
Abanye bathi uMugabe wayengumbusi omuhle ozakhunjulwa ngokuqakathekisa ezemfundo lokwabela abantu abansundu amapulazi awahluthunela abalimi abamhophe kungelambadalo.
Abanye ngabathi lanxa bevuma ukuthi uMugabe wathuthukisa uzulu weZimbabwe ngokumabela umhlabathi, bayakunanzelela ukuthi wayelezici ezinengi.
Kodwa bakhona njalo abathi uMugabe wayengumbusi omubi owabulala abantu abanengi esabusa, okugoqela ngesikhathi sombuqazwe weGukurahundi. Ngakho, bathi akulalutho oluhle ngaye.
Ukuhlaziya imbali kaMugabe sixhume ilunga leMDC uMnu Edwin Ndlovu lelunga leZanu PF uMnu Joseph Tshuma onguye osungula lingxoxo.
