amalinks wokungena

Breaking News

Useze Wabekwa uMugabe Emzini Wakhe koZvimba


Owake waba nguMongameli weZimbabwe uMnu Robert Mugabe, yena obhubhele kweleSingapore mhlaka 6 kulinyanga, uze wabekwa egumeni lomuzi wakhe koZvimba ngoMgqibelo.

UMugabe ungcwatshelwe emzini wakhe kulandela ukwala kwemuli yakhe ukuthi abekwe emathuneni amaqhawe eNational Heroes Acre njengobekufunwa nguhulumende.

Umndeni kaMugabe uthi umuyi watshiya elayezele ukuthi kumele abekwe ngakibo.

Umzukulu kaMugabe, uMnu Leo Mugabe, utshele intathelizindaba ukuthi uMugabe wathi kafuni kubekwa eHeroes Acre ngoba kulezitha zakhe ezilakho ukugebha ibhokisi lakhe zisike izitho zakhe zizisebenzise.

Omunye wabakhulume engcwabeni lo ngudadewabo kaNkosikazi Grace Mugabe, uNkosikazi Shuvai Gumbovhuma.

“Mina ngakhuluma laye umdala wangazisa ukuthi kafuni ukuya eHeroes Acre ngoba wachothozwa kakhulu,” kutsho uNkosikazi Gumbovhuma.

Amazwi kaGumbovhuma asekelwe ngesinye njalo isihlobo sikaMugabe uMnu Walter Chidakwa, yena othe lanxa inkokheli yomdabu yayifisa ukuthi umuyi abekwe eNational Heroes Acre, abemuli bakubona kufanele ukuthi bahloniphe izifiso zikaMugabe.

Omunye wabalwa impi yenkululeko uMnu Jabulani Sibanda, obekhona laye emngcwabeni lo uthe ukubhubha kukaMugabe yikulahlekelwa kwelizwe lonke lomhlaba jikelele.

“Ukulahleka kwakhe yikulahlekelwa kwesizwe, ukulahleka kwakhe yikulahlekelwa komhlaba. Wasebenzela abantu wabapha umhlabathi, imigwaqo…” kutsho uSibanda ekhuluma leStudio 7.

Abemuli kaMugabe babonge uhulumende ngokubavumela ukuthi bambeke emzini wakhe.

please wait

No media source currently available

0:00 0:02:45 0:00
XS
SM
MD
LG