amalinks wokungena

Breaking News

UChamisa kuMnangagwa: Tshiyana Lamadlwane Owadlalayo laboMaKhupe Uze Kimi Sikhulumisane


Abasekeli beMDC besemkhosini wokuthakazeleli iminyaka engamatshumi amabili ibandla labo libunjiwe
Abasekeli beMDC besemkhosini wokuthakazeleli iminyaka engamatshumi amabili ibandla labo libunjiwe

Umkhokheli weMDC uMnu Nelson Chamisa uthi inkulumo ezikhona phakathi kwamabanda amancane aphikisayo loMongameli Emmerson Mnangagwa ngamadlwane nje angasoze aphume lalutho.

Ekhuluma ngoMgqibelo emkhosini wokuthakazelela ukusungulwa kwebandla lakhe ngo1999, uChamisa uthe ukuze inkinga zeZimbabwe zilungisiswe, kudingakala ukuthi uMnangagwa akhulumisane laye.

Inkulungwane zabasekeli beMDC ziqunge isibindi zayathakazelela ukufikisa iminyaka engamatshumi amabili kwebandla lazo eRufaro Stadium lanxa amapholisa evukele ukuvala imigwalo lokwalisa amalunga alelibandla ukungena emahofisini awo eMorgan Tsvangirai House.

Ekhuluma kulumbuthano, uChamisa uthe ngaphandle kokuthi ibandla lakhe liphiwe ithuba lokuhlala phansi loMnangagwa baqhobe amathambo engqondo ngokwenzakalayo elizweni, akula lutho oluzalunga.

Uthe ibandla lakhe selizaqala ukwenza okubambekayo angakubethanga ngegama ukuze ilizwe lisuke enkingeni eliphakathi kwazo, ezigoqela ukusilela kwemisebenzi, ukuswelakala kwemali lobuyanga osobuhlasele uzulu.

“Sabona ukuthi iPOLAD yayiyindlela nje yokuhlekisana lokudlalisa isikhathi sabantu. Woza sikhulumisane… Lingaqambelana amanga laboMaKhuphe laboMadhuku kodwa ukuze ilizwe liye phambili kufuze sikhulumisane,” kutsho uChamisa.

UChamisa uphinde wasola amapholisa ngokuzama ukuvimba umhlangano wabo.

“Ngibone namhla ekuseni amapholisa esala ukuba senze umsebenzi wethu. Ngibone sebekhalala befuna ukusivimbela ukubuthana. Kabasoze banelisi ukusivimbela ngoba umhlangano wethu uqine saka,” uqhubeke esitsho uMnu Chamisa.

Ekhuluma leStudio 7 kulumhlangano, umsekeli kaChamisa uMnu Welsman Ncube uthe bayathokoza kakhulu ngokufikisa iminyaka engamatshumi amabili.

Uthe njalo bayawakhumbula amaqhawe asungula lelibandla.

“Ilanga lanamhlanje liqakatheke kakhulu ngoba iMDC ibijabulela iminyaka engu20 igcwalisa izifiso zezizalwane ze Zimbabwe. Kuqakathekile ukuthi njalo sitshayele ihlombe labo abasikholekelayo ubaba uTsvangirai, uGibson Sibanda, uFletcher Dulini Ncube labo bonke esasisebenza labo,” kutsho uNcube.

Kusenjalo, umeli weNorton edale lephalamende uMnu Themba Mliswa uhozwe ngabasekeli beMDC ngesikhathi esipha umbiko wakhe wokufisela lelibandla amhlophe.

Abanye abakade besembuthanweni lo bagoqela abameli beMelika, abeNetherlands labeSwizterland eZimbabwe, abezokholo, abeZimbabwe Congress of Trade Unions lezifundi zemakolitshini.

please wait

No media source currently available

0:00 0:02:40 0:00
XS
SM
MD
LG