Ibandla leMDC lithi ubunzima uzulu abhekane labo buveza sobala ukwehluleka kukaMongameli Emmerson Mnangagwa ukuvuselela umnotho lokusungula imisebenzi ayithembisa abantu ngesikhathi ekhankasela ukhetho nyakenye.
Uzulu weZimbabwe udla imbuya ngoluthi ngenxa yokudilika komnotho, ukusilela kwemali emabhanga, ukudula kwezinto, ukusilela kwamandla kagetsi lezinye indubo ezinengi-nengi.
Embikweni awethule ngoLwesibili oweState of the Nation Address (SONA), uMnangagwa uthe amanyathelo kahulumende wakhe aselethe ubungcono empilweni kazulu.
Kodwa abeMDC bathi akula bubelo obukhona.
Ukuhlaziya loludaba sixoxe loDr Nkululeko Sibanda, isikhulumeli somkhokheli weMDC kanye lowake wamela iInsiza South edale lephalamende elilunga leZanu PF uMnu Malaki Nkomo onguye osungula lingxoxo.
