EleZimbabwe ngoLwesibili limanyane lamazwe omhlaba ekunanzeni usuku lwabesifazana abahlala emaphandleni olweInternational Day of Rural Women omama abanengi bekhonona ngokoma kwempilo ngenxa yokudilika komnotho.
Bebekhala njalo ngokuswela uxhaso lokuqhuba inhlelo zokuziphilisa oluvela kuhulumende. Omunye wabomama laba nguNkosikazi Nhlanhla Sikhunyana, ongumfelokazi ohlala ePlumtree esigabeni sakoMangubo.
“Indlala isithwaise nzima, imisebenzi ayikho. Imali yakhona ayithlakali, abantwana kabasayi lezikolo; sisebunzimeni obukhulu,” kutsho uNkosikazi Sikhunyana.
Amazwi kaNkosikazi Sikhunyana agcizelelwe yisakhamusi seLukamba, eNkayi uNkosikazi Siphathisiwe Nxumalo.
UManxumalo lilunga lenhlanganiso yabesifazana abaphila ngokulima imibhida lokunye, eyeLukamba Nutritional Garden.
Kodwa uthi bukhulu ubunzima abahlangana labo empilweni.
“Akulazindawo lapho abantwana bethu abangafunda khona imisebenzi yezandla ukuze baziphilise,” kutsho uMaNxumalo.
Umphathintambo obona ngenhlelo zabesifazana uNkosikazi Sithembiso Nyoni yena uthi lanxa usuku lwanamuhla lubalulekile, uyabunanzelela ubunzima omama bemaphandleni abahlangana labo.
Kodwa uthe zinengi inhlelo ezikhona ezingaphathisa omama, ikakhulu ezebhanga leWomen’s Bank, lapho athi abesifazana bengaziqoqa babe sebesiyacela imali yokuqhuba indlelo zabo.
“Uya applier, uvule i-account ubusubhalela ibhanga ukuze uthole usilo. Lathi njenge-ministry ziyafuqa ukuthi usizo lolu luphume ngokuphangisa,” kutsho uNkosikazi Nyoni.
Unobhala jikelele womanyano weUnited Nations uMnu Antonio Guterres yena wethule amazwi okukhuthaza ohuumende bamazwe omhlaba ukuthi bathuthukise impilo zabesifazana bemaphandleni ngoba beyibo insika yempumelelo emhlabeni jikelele.
