Amabandla ezombusazwe ehlukene ngemibono kudaba lwezijeziso zenotho ezafakelwa iziphathamandla zeZanu PF lamankampani alobudlelwano lalelibandla ngamazwe afana leMelika lomanyano weEuropean Union.
Amazwe angentshonalanga ethesa amalunga eZanu PF izijeziso lezi eminyakeni engamatshumi amabili edluleyo ewethesa icala lokwephula amalungelo oluntu, ukuqilibezela kukhetho lokubusa ngodlame.
AbeZanu PF labamanye amabandla aphikisayo amancane bathi izijeziso lezi aziphazamisa labo eziqondiswe kubo kuphela kodwa ziphazamisa uzulu weZimbabwe jikelele lemizamo kahulumende yokuvuselela umnotho. Ngakunjalo, bathi kumele zesulwe.
Lo ngumkhosi abazawuhlaba njalo ngoLwesihlanu ngesikhathi betshengisela ezitaladeni phezu kwezijeziso lezi bebambene lamanye amazwe akumanuano weSADC.
Ilunga leZanu PF uMnu Believe Gaule uthi ibandla leMDC yilo elakhankasela izijeziso lesi. Ngakho, uthi kumele iziphathamandla zalelibandla zicele iMelika labeEuropean Union ukuthi bazesule.
“Ngabantu abanjani abafuna ukungena embusweni ngokuhlupheka kwabantu,” kutsho uGaule ekhuluma lomsakazo weStudio 7.
Kodwa isikhulumeli seMDC uMnu Daniel Molokele uthi iZanu PF idlalisa isikhathi lemali ngokutshengisela phezu kodaba lwezijeziso lolu.
“Wonawo ama-sanctions abakhuluma ngawo yindlela yokubalekela udaba lokuthi behlulekile ukukhokhela ulizwe lethu kakuhle. So, ama-sanctions are just a cover up,” kutsho uMolokele.
Amazwi kaMolokele agcizelelwe yingcwethi kwezombusazwe uDr Brilliant Mhlanga.
