Umthethwandaba weConstitutional Court ngoLwesithathu ulahle isicelo somkhokheli weMDC-T uNkosazana Thokozani Khupe esokuthi kumele abhadalwe iholo lakhe lezinye imfanelo nguhulumende ngoba waxotshwa edale lephalamende ngaphandle komthetho.
UMaKhupe ubecele njalo inkantolo ukuthi inqume ukuba ukuxotshwa kwakhe kubandla leMDC elikhokhelwa nguMnu Nelson Chamisa kwakungekho emthethweni.
Kodwa umahluleli weConstitutional Court uMnu Luke Malaba ukwalile lokhu esithi loludaba aluselasisindo ngoba sokwenziwa ukhetho olutsha.
Isikhulumeli sikaMaKhupe, uMnu Khaliphani Phugeni uthi bayasamukela lesi sinqumo.
“Isinqumo lesi asisihluphi lakancane. UMaKhupe uyasamukela isinqumo lesi njalo uyasibonga ngoba imithethwandaba yiyo esiya kuyo nxa silokudonselana,” kutsho uMnu Phugeni.
“Ngokunjalo, siyile enkantolo yahlulela ngendlela ehlulele ngayo. Ngakho asikwazi ukuphikisana lesinqumo lesi.”
Isikhulumeli seMDC kaChamisa uMnu Daniel Molokele utshele iStudio 7 ukuthi bebengakabilakho abangakutsho ngaloludaba.