Iqembu elabunjwa ngenjongo yokuzilibazisa lokuxoxisana enkundleni yeFacebook, eleMakhox Women’s League, selisungule umkhankaso wenhlelo zentuthuko ngenhloso yokusiza izibhedlela lezikolo eZimbabwe.
Omunye wabakhokheli baleliqembu uNkosazana Angie Phiri, uthi ngesikhathi belisungula injongo yabo yayingeyokulibazisana bezixoxela okubakhathazayo.
Kodwa ngemva kwalokho bananzelela ukuthi zinengi izinto abangazenzela umphakathi ekhaya, ikakhulu njengoba abanengi babo besemazweni alomnotho ongcono kakhulu kulasekhaya.
“Sile project yezicathulo zesikolo lamasokisi esiwathengela abantwana besikolo eZimbabwe esiwanikeza ikakhulu abantwana ababuya emulini eziswelayo,” kutsho uNkosazana Phiri.
Omunye njalo wabakhokheli baleliqembu uNkosazana Samukele Mpala, uthi sebeqalile ukwenza imicimbi etshiyeneyo bedinga imali yenhlelo zabo.
“Siqoqe umkhosi wokudinga imali yokuthi sithwale i-hospital equipment siyisa koBulawayo. Siyabonga kakhulu kwababuyileyo ukuzosixhasa. Sibonga usekelo lwenu olunengi,” kutsho uMaMpala.
Abezifazana laba bakhuthaza osomabhizimusi, ikakhulu abadabuka eMandebeleni ukuthi babaxhase ngakho konke okungasiza lokuthuthukisa impilo yababhekane lobunzima bezomnotho eZimbabwe.
