Uzulu weZimbabwe uzadlala ikhisimusi ephakathi kobunzima obumangalisayo ngeviki ezayo, obugoqela ukutshabalala komnotho, ukusilela kwamanzi lamagetsi kanye lokudula kwezinto ezitolo.
Inengi lisola uMongameli Emmerson Mnangagwa ngokwehluleka ukugcwalisa inhlelo zentuthuko azithembisa uzulu ngesikhathi ekhankasela ukhetho lwanyakenye.
Ibandla leMDC elikhokhelwa nguMnu Nelson Chamisa lithi uMnangagwa kumele avume ukuthi uyehluleka njalo asuke embusweni.
Ngo2008 eleZimbabwe lehlelwa yibunzima obufanayo umanyano weSadc wasukhetha owayenguMongameli weSouth Africa uMnu Thabo Mbeki ukuthi abe ngumlamulankunzi phakathi kweZanu PF leMDC.
Amabandla womabili acina evuma ukubumba uhulumende wenkazatho.
UMbeki uphenduke njalo elizweni kuliviki wahlangana loMnangagwa, uChamisa kanye lenkokheli yamabandla amancane.
Kunakanelwa ukuthi uMbeki uzama ukuletha uMnu Chamisa loMnangagwa ndawonye ukuthi bakhulumisane.
Umbuzo omkhulu obuzwa ngabanengi ngothi kambe ababili laba bengacina bekhumisana umlotha na njalo bebumbe uhulumende womanyano njengoMnu Morgan Tsvangirai loMnu Robert Mugabe ngo2009?
Ukuhlaziya loludaba sixhume ilunga leZanu PF uMnu Believe Gaule lomgcinisihlalo weMDC uNkosazana Thabitha Khumalo yena othi kulusizi kakhulu ukuthi ikhisimusi iza uzulu ephakathi kobunzima.