UMongameli Emmerson Mnangagwa ngoMgqibelo ukhuthaze uzulu weZimbabwe ukuthi abambene ngazo zonke izikhathi ukuze ilizwe liphumelele.
Emazwini awethule phambilini kwekhefu lokunanza ukubambana ngeSonto, uMnangagwa uthe ukwehlukana kwabantu ngamabandla ombusazwe akumelanga kudabule kumbe kudilize isizwe njalo kulethe inzondano phakathi kwabo.
Embikweni obukhanya uqondiswe kumkhokheli webandla leMDC uMnu Nelson Chamisa, uMnangagwa uthe ukuloyisa ukungena embusweni lakho akumelanga kuphe umuntu imvumo yokwehlukanisa abantu.
“Ukudinga ukungena embusweni akumelanga kube yilayisensi yokwehlukanisa abantu. Ezombusazwe zethu kazimelanga zehlukanise kumbe zidilize ilizwe lethu,” kutsho uMnangagwa.
“Ezombusazwe kumele zilethe abantu ndawonye kuthuthukiswe umnotho lozulu jikelele. Ukubambana, ukuthula lothando makwande eZimbabwe. UNkulunkulu alibusise lonke njalo abusise ilizwe lethu.”
Kodwa ibandla leMDC lisole uMnangagwa lisithi akalalungelo lokukhuthaza ukubambana ngoba kunguye oyehlukanisa uzulu wezimbabwe ngombuso wakhe omubi.
“Siqede umnyaka wonke lowu uMnangagwa esihlukuluzwa njengabantu beMDC. Ngakho kalalungelo lokukhuluma ngokubambana. Akalalungelo lokuba ngubaba womuzi,” kutsho isikhulumeli seMDC uMnu Daniel Molokele, ongumeli njalo weHwange Central edale lephalamende.
