Umphathintambo wezempilakahle uMnu Obadiah Moyo uthi uhulumende sehlele indawo eHarare laseVictoria Falls lapho okuzagcinelwa khona abantu abanakanelwa ukuthi bengaba belegciwane leCoronavirus, lona eselibulele abantu abedlula amakhulu amathathu, ikakhulu kweleChina.
UMoyo utshele umsakazo weZBC ukuthi bathethe lelinyathelo ukuze benelise ukulwisa leligciwane alubana ethe wabakhona otholakale elalo.
Ekhuluma leStudio 7 ngempelaviki uMoyo uveze ukuthi inani labantu abahlolisiswa nguhulumende ngemva kokwethekelela amazwe alegciwane leli beselikhwele ladlula kancane amakhulu amabili, 221.
Abanye babantu laba bafikela eHarare laseVictoria Falls behamba ngendizamtshina.
UMeya weVictoria Falls uMnu Somvelo Dhlamini utshele iStudio 7 ukuthi njengekhansili, manengi amanyathelo asebewathethe awokulimukisa uzulu ngalumkhuhlane.
“Izakhamizi zeVictoria Falls ziphatheke kubi njengoba likwazi ukuthi iFolosi ngenye yendawo ezivakatshelwa kakhulu elizweni,” kutsho uMnu Dhlamini.
“Njengomanisipala, sifundisa abantu ukuthi bengabambi izinyamazana njalo bengadli ukudla okungahlolwanga. Kumele bageze izandla ngazo zonke izikhathi ukwenzela ukuthi igciwane leli lingamemetheki.”