Abakhankasela ukulondolozwa komthetho kanye labalwela amalungelo eZimbabwe bathi bajabulile kakhulu ngesinqumo seConstitutional Court yakweleMalawi esokuchitsha impumela yokhetho lukaMongameli oluqhutshwe nyakenye usithi kwaba lokuqilibezela.
Umthethwandaba lo uthe kumele kwenziwe ukhetho olutsha phakathi kwenyanga ezinhlanu ezilandelayo.
Abahluleli balinkantolo besule limpumela ngemva kokufumana ubufakazi obusuthisayo bokuthi kwaba lokuqilibezela okwenza ukthi owayevele enguMongameli ngalesosikhathi uMnu Peter Mutharika anqobe.
Abakhokheli bamabandla aphikisayo uMnu Lazarus Chakwera loMnu Saulos Chilima yibo ababekhweze loludaba enkantolo.
Ekwethulweni kwempumela yalolukhetho kwaqhamuka odlakela eMalawi abamabandla aphikisayo besithi uMutharika uqilibezele.
Udaba lolu lufana xathu lolweZimbabwe lapho umkhokheli weMDC uMnu Nelson Chamisa aphikisa khona ukunqoba kukaMongameli Emmerson Mnangagwa.
Umehluko nje yikuthi inkantolo yeZimbabwe yanquma ukuthi uMnangagwa wanqoba kuhle.
Kudaba lweMalawi lolu, uMongameli Mutharika uselakho ukuphikisa isinqumo sayizolo edale leSupreme Court. Sixhume ocubungula ezombusazwe uMnu Effie Dlela Ncube.
