Umkhokheli weMDC uMnu Nelson Chamisa ngoLwesine wethule ugwalo olulezikhalazo ezingamatshumi amabili ibandla leli elithi kumele zigcwalisiswe ukuze ukhetho luka2023 luqhutshwe ngendlela esuthisayo kungela kuqilibezela.
Izikhalazo lezi zigoqela ukuthi ikhomishini yezokhetho, iZimbabwe Electoral Commission (ZEC) kumele idilizwe kubunjwe entsha ezasebenza izimele kungela kungenela kukahulumende.
IMDC ithi njalo imithetho yonke kumele ihlelwe ngendlela ehambelana lesisekelo sombuso welizwe njalo kuqedwe udaba lokuthenga amavoti ngokudla ethi kwenziwa yiZanu PF.
Ithi njalo izizalwane zeZimbabwe ezihlala kwamanye amazwe kumele zivunyelwe ukuvota lempumela yokhetho yethulwe phakathi kwesikhathi esifitshane ngemva kokhetho.
UMnu Chamisa uthe ukungena kukhetho izinto lezi zingalungiswanga kuyabe kuyikudlala ngesikhathi ngoba kusobala ukuthi ibandla leZanu PF lizaqilibezela.
Kodwa abeZanu PF bathi nxa iMDC ifuna izikhalazo zayo zilungiswe, kumele ingene kunkulumo zikaMongameli Emmerson Mnangagwa lenkokheli yamabandla amancane ezePOLAD.
Ukuhlaziya loludaba sixhume ilunga leZanu PF uMnu Malaki Nkomo lelunga leMDC uMnu Edwin Ndlovu onguye osungula lingxoxo.
