Baphethe amathumbu ngezandla abeZimbabwe kweleSouth Africa kulandela imithetho lemigoqo enzima eyaziswe nguMongameli Cyril Ramaphosa emizameni yokwenqabela ukumemetheka kwegciwane leCoronavirus.
Izethekeli ezivela emazweni adume ngecoronavirus agoqela Italy, Germany, Spain, Iran, South Korea, China, United Kingdom, United States lamanye azisavunyelwa kweleSouth Africa.
Umongameli Ramaphosa uthi abakwamanye amazwe abasanda kuvela kula mazwe labo abavunyelwa ukungena kweleSouth Africa.
“Sicabange ukuthatha amanyathelo aphuthumayo ukuze sivikele abantu bethu sehlise lomthelela waleli gciwane,” kutsho uRamaphosa.
Kodwake osekwethuse abanengi yimigoqo eyenqabela ukuhamba kwabantu kweleSouth Africa okuyinto uhulumende athi izakwenqabela ukuthelelwana kwegciwane lecoronavirus.
Ukugada imitshova, amabhasi loba isitimela kuzavunyelwa kuphela kulabo okulesidingo esikhulu ukuthi baphume ezindlini nxa kungenjalo umuntu kufanele ahlale phansi.
Isizalwane seZimbabwe uMnu. Greatman Mkhwebu uthi impilo izakuba lukhuni.
“Kuzasihlukumeza ngoba siba lezifo okumele loba kanjani sihlanganyele sihambise isidumbu ekhaya. Siyangena amaSonto njalo sizahlukumezeka ngoba emsebenzini sihamba ngamatekisi. Ma ungasasebenzanga awuholi ngapha irent ithi ngikhona ngapha eceleni, Ngakho kuzosinzimela mpela ngoba inkampani isingadiliza izisebenzi ngoba kungekho mali engenile,” kutsho uMkhwebu.
Umgcinisihlalo wenhlanganiso yeZimbabwe Community in South Africa uMnu. Nqabutho Mabhena uthi loba limigoqo le isinda kangakanani kuqakathekile ukuthi zonke izizalwane zeZimbabwe ezikweleSouth Africa ziyilandele.
Kutsho uMabhena: “Sicela ukuthi silandele izimiso lezo. Singahlangani inani eledlula ikhulu. Sibuye futhi sinanzelele ukuthi ukuhlanzeka kuqakathekile ikakhulu ukugeza izandla lakho konke okuthiwa sikwenze ukuthi siphephe kuleligciwane elikhona.”
Imibuthano yabantu abedlula ikhulu layo kayisavunyelwa. Sekukhuthazwe njalo uzulu ukuthi ekele umkhuba wokuxhawula njengoba kungenye yendlela leli gciwane elithelelwana ngayo.
Kulemingcele njalo edlula amatshumi amathathu ezavalwa kusitsho ukuthi abakwamanye amazwe sebezangena nzima kweleSouth Africa.
Isizalwane seZimbabwe uMnu. Cosmas Ncube uthi ukwenqatshelwa kwenhambo kuzaba lusizo eZimbabwe.
“NGokuvalwa kwalezo nhambo ngibona angani kuzoba ngcono kakhulu ngoba bebezobuyela ekhaya abantu sebephethe imikhuhlane ezofika ibulale abantu ngoba uhulumende weZimbabwe kukhanya akazi ukuthi kumele aqalephi, ngoba ungumnyanga umosha into zonke. Soke lokhu okukaRamaphosa kubonisa ubukhokheli,” kutsho uNcube.
Ilunga leZAPU uMnu. Carnicious Nkala ukhuthaza abeZimbabwe abebezilungiselele ukuyakudla ikhefu lephasika besekhaya ukuthi kuhle bengahambi okwakhathesi.
Kutsho uNkala: “Abanengi balungiselela ukuya ekhaya ngaleso sikhathi. Kodwa bengilesicelo ukuba kulabo abangakhona ma kungabakhona ukuthi lihlelise inhlelo zenu zokuya ekhaya ngoba lumkhuhlane ukhona njalo futhi kulobungozi ma ungabhebhetheka uyefika ezweni laseZimbabwe siyakwazi ukuthi akulalutho. Akungabi khona ukuthi siphikisane lalokhu kodwa asizameni ukusebenzisana.”
Limigoqo ilandela ukukhwela ngesiqubu kwenani labantu asebelegciwane lecoronavirus kweleSouth Africa bona asebefika kwabangamatshumi ayisikhombisa.
