amalinks wokungena

Breaking News

Ukhona Oke Waba Ndawonye loZororo Makamba Osebanjwe Umkhuhlane weCoronavirus


Kulandela ukubhubha kukaMnu Zororo Makamba ngeCoronavirus, uhulumende uthi kulomuntu oke waba ndawonye lomufi osebanjwe lumkhuhlane.

Embikweni awethule ntambama izolo uhulumende uthe umuntu lo uba ngowesithathu osetholakale eleCoronavirus eZimbabwe.

Uthe njalo phakathi kwabantu abalitshumi lanhlanu abahlolwe lumkhuhlane izolo, inengi labo like laba ndawonye loMakamba, yena obhubhele esibhedlela seWilkins ngoMvulo.

UMakamba ube ngowakuqala eZimbabwe ukubulawa yilumkhuhlane.

Uwubanjwe ngemva kokwethekelela kweleMelika kumaviki asanda kwedlula njalo ungcwatshelwe eHarare izolo.

UMakamba ubeyindodana kasomabhizimusi olodumo uMnu James Makamba yena olilunga leZanu PF.

Imuli kaMakamba ibikwa ithukuthele ngokutshona kwakhe isithi kaphathwanga kuhle eWilkins. Ithi isibhedlela lesi kasilalutho oludingakalayo ekulwisananeni lomkhuhlane weCoronavirus.

Kodwa ikhansili yeHarare, eyiyo umnikazi walesi sibhedlela ikulandule lokhu.

UMongameli Emmerson Mnangagwa wazise ngokuvalwa kwemingcele yelizwe ngoMvulo emizameni yokwenqabela ukumemetheka komkhulane lo.

Kodwa eminye imingcele ibikwa isavuliwe njalo abantu bayaphuma lokungena elizweni.

Olwela amalungelo oluntu uMnu Charles Nyoni utshele iStudio 7 ukuthi uhulumende kumele aqinise imizamo yakhe njalo avimbe yonke imibuthano kungelani lokuthi ngeyabantu abangaki.

please wait

No media source currently available

0:00 0:02:35 0:00

Kusenjalo uhulumende uthi kulowesifazana ozithweleyo obekhwehlela njalo evaleka ohambe esibhedlela seMasvingo izolo ukuyadinga usizo.

Uthi umuntu lo uke wethekelela kweleSouth Africa kunsukwana ezedluleyo.

Abezempilakahle bamhlolile umkhuhlane weCoronavirus lumuntu njalo impumela ikhangelelwe yiloba nini.

EleZimbabwe lithole usizo lwezinto zokusebenzisa ekulwisaneni lomkhuhlane lo izolo eziphiwe wonke amazwe eAfrica yinkisela yakweleChina uMnu Jack Ma.

Izinto lezi zigoqela okokuhlola lumkhuhlane kanye lama-mask okugqoka ebusweni lokuvala amakhala. Uhulumende uthi uyalubonga kakhulu lolusizo.

Facebook Forum

XS
SM
MD
LG