Uhulumende uthi uzaqhatsha izisebenzi zogatsha lwezempilakahle ezedlula inkulungwane ezine, 4,200, ukuze ziphathise kumizamo yokwenqabela ukumemetheka komkhuhlane weCoronavirus.
Kumbiko awethule izolo, umphathintambo obona ngezemali uMnu Mthuli Ncube uthe njalo uhulumende sezaqalisa ukuphathisa imuli eziyisigidi eziswelayo ngemali yokuziphilisa.
Uthe uhulumende sefake imali engange$500 million kunhlelo zeCoronavirus.
UNcube wengeze wathi uhulumende seyesule umthelo wezinto ezifunwa yizibhedlela ngesikhathi sokulwisana lalumkhuhlane ezifana lemitshina, amaphilisi lokunye.
Uveze njalo ukuthi uhulumende selaye ingatsha zakhe ukuthi ziqambule imali eziyiphiwe kubudget yalonyaka ukuze ifakwe kunhlelo zeCoronavirus, yona esibulele abantu abafika inkulungwane phose ezingamatshumi amane, 40,000 emhlabeni jikelele okugoqela oyedwa eZimbabwe.
UNcube uthe njalo umthelo wokubili ekhulwini obanjelwa abantu nguhulumende lawo usuzasetshensiswa kunhlelo zalumkhuhlane.
Isiphathamandla senhlanganiso yeBulawayo Progressive Residents Association uMnu Ambrose Sibindi utshele iStudio 7 ukuthi uyathokoza ngohlelo lokuphathisa imuli eziswelayo lanxa esithi uhulumende kumele aqhube loluhlelo ngendlela esobala engela nkohlakalo.
