Odokotela labongi bahlangane loMongameli Emmerson Mnangagwa ngoLwesine bamxwayisa ukuthi engezelele inhlelo zokuhlola umkhuhlane weCoronavirus, wona osubulele abantu abathathu eZimbabwe.
Bekhuluma emhlanganweni abawenzele eState House, abezempilakahle laba bathe njalo ukuhlolwa kwabantu kumele kwenzelwe endaweni zonke zelizwe hatshi eHarare kuphela njengalokhu okwenzakalayo.
Bathe ukusungulwa kwendawo ezinengi kuzakwenza ukuthi abantu abanengi bathole ithuba lokuyahlolwa lumkhuhlane njalo impumela yethulwe masinyane.
Okwamanje bangamakhulu amane kuphela elizweni abantu asebehloliwe njalo abalitshumi lanye batholakale belayo iCoronavirus.
Owesithathu osefile ubhubhele esibhedlela seWilkins eHarare ngoLwesithathu. Emhlabeni jikelele, umkhuhlane lo usubulele inkulungwane ezingamatshumi ayisitshiyagalolunye, 90,000.
Abongi labodokotela laba bathe njalo abezempilakahle bonke kumele bahlole ukuze bekwazi ukuzivikela njalo bengatheleli izigulane lumkhuhlane.
UMnangagwa yena ukhuthaze uzulu ukuthi eqhubeke ngohlelo lokuzivikela ngokuhlala ngekhaya.
Ukukhonona kwabantu kubangele njalo ukuthi uhulumende evule imikambo yokuthengisela izilimo kuliviki. Le yiviki yesibili uhlelo lokuvalwa kwelizwe luqalile lanxa nje abantu abanengi betshona beminyezelana kundwendwe zokuthenga impuphu.
Umqondisi wenhlanganiso yeCenter for Public Policy uMnu Mfundo Mlilo utshele iStudio 7 ukuthi ukuhlupheka kwabantu okwenza batshone kundwendwe kwenza kubenzima ukulwisana leCoronavirus.
