Umthethwandaba weHigh Court ngoLwesibili unqume ukuthi amapholisa kumele atshiyane lokuhlukuluza abantu ngesikhathi elondoloza umthetho wokuvalwa kwelizwe emizameni yokuvimba ukumemetheka komkhuhlane weCoronavirus.
Inhlanganiso yeZimbabwe Lawyers for Human Rights yiyo ebikhweze loludaba emthethwandaba imele isakhamuzi seKaroi uNkosikazi Lucia Masvondo yena othi walunyiswa yizinja ngamapholisa emethesa icala lokuhambahamba.
Kulembiko njalo yokuhlukuluzwa kwabantu endaweni ezitshiyeneyo ngamasotsha lamapholisa. Kodwa umthethwandaba uthe lokhu yikwephulwa kwamalungelo oluntu njalo kumele kuphele.
Umthethwandaba munye unqume njalo ukuthi uhulumende kumele aphe odokotela labongi kanye labo bonke abasebenza kwezempilakahle impahla edingakalayo nxa belwisana leCoronavirus ukuze bazivikele kulumkhuhlane.
Udaba lolu lwahanjiswa emthethwandaba yinhlanganiso yeZimbabwe Asociation of Doctors for Human Rights.
Isiphathamandla senhlanganiso yeCitizens Covid-19 Monitor uMnu Effie Dlela Ncube utshayele umthethwandaba ihlombe ngokwethula izinqumo zombili.
Kolunye njalo udaba obelusemthethwandaba ngoLwesibili, abahluleli beHigh Court bahluze isicelo sokuthi inkantolo ibambe uhulumende ngamandla ukuthi aphathise abaswelayo ngokudla lemali ngesikhathi sokuvalwa kwelizwe.
Udaba lolu lukhwezwe yisakhamuzi seHarare uMnu Mfundo Mlilo lomeli weHarare North edale lephalamende olilunga leMDC uMnu Rusty Markham.
Ababili laba bebemelwa ligqwetha leZimbabwe Lawyers for Human Rights njalo engumsekeli kaMongameli webandla leMDC uMnu Tendai Biti.
Umthethwandaba kawuphanga isincumo sawo kuloludaba (judgement reserved). Kawutshongo njalo ukuthi uzakwahlulela nini.
